Тошкент, Ўзбекистон (UzDaily.uz) — Жорий йил 24 февралда СМТИ директори Элдор Арипов Кўрфаз тадқиқот маркази (Gulf Research Center) асосчиси ва раиси Абдулазиз Сагер билан учрашув ўтказди.

А.Сагер Буюк Британиянинг Ланкастер университети сиёсий фанлар доктори илмий даражасига эга. У халқаро муносабатлар, хавфсизлик ва иқтисодиёт соҳаларига оид кўплаб нашрларнинг муаллифи ҳисобланади.

Суҳбат чоғида томонлар глобал ва минтақавий кун тартибидаги кенг кўламли масалаларни муҳокама қилишди. Дунёдаги янги тенденциялар Кўрфаз араб давлатлари ҳамкорлик кенгаши (КАДҲК) ва Марказий Осиё мамлакатлари ўртасидаги ўзаро қизиқишнинг ортишига сабаб бўлмоқда.

Икки минтақа халқларининг кўп асрлик мулоқот анъаналарига таяниб, томонлар савдо-иқтисодий, инвестициявий ва маданий-гуманитар ҳамкорликнинг улкан салоҳиятини ишга солишга ҳаракат қилмоқда.

Сўнгги пайтларда араб мамлакатлари минтақа давлатлари иқтисодиётининг турли соҳаларига фаол сармоя киритмоқда, бунда энергетика, инфратузилма, қишлоқ хўжалиги ва юқори технологияларга алоҳида эътибор қаратилмоқда. Хусусан, уларнинг Марказий Осиёга йўналтирилган инвестициялари ҳажми сўнгги ўн йил ичида деярли учдан бирга кўпайган бўлса, экспорт ҳажми эса учдан бир қисмдан ҳам кўпроққа ошган.

Икки томонлама алоқалар билан бир қаторда, минтақалараро форматдаги ҳамкорлик ҳам жадал ривожланмоқда.  Бунинг яққол исботи сифатида 2023 йилнинг июлида ўтказилган Марказий Осиё ва КАДҲК раҳбарларининг илк саммитини келтириш мумкин. Унда давлат раҳбарлари 2027 йилгача мўлжалланган Қўшма ҳаракатлар режасини маъқулладилар.

Давлат раҳбарлари томонидан илгари сурилган ташаббус ва таклифларнинг амалий ижросини таъминлаш мақсадида, СМТИ ва Кўрфаз тадқиқот маркази ўртасида келишув имзоланди. Унга кўра, Ўзбекистонда бўлиб ўтадиган Кўрфаз араб давлатлари ҳамкорлик кенгаши ва Марказий Осиё давлатлари иккинчи саммити арафасида, Марказий Осиё–КАДҲК таҳлилий марказларининг биринчи форумини биргаликда ташкил этиш режалаштирилди.

Учрашув давомида етакчи илмий-тадқиқот ташкилотлар вакиллари ўзаро манфаатли бўлган соҳаларда кўп томонлама ҳамкорликни ривожлантириш истиқболларини муҳокама қилишлари ҳамда ўзаро фойдали шерикликни янада чуқурлаштиришга қаратилган аниқ таклифлар ишлаб чиқишлари кутилмоқда.

Gulf Research Center (GRC) 2000 йилда ташкил этилган етакчи таҳлил маркази ҳисобланади. Марказ Кўрфаз мамлакатларининг ижтимоий, иқтисодий ва сиёсий жиҳатларини ўрганишга ихтисослашган. GRC халқаро муносабатлар соҳасида дунёнинг энг нуфузли 150 та таҳлилий марказлари қаторига киради. Марказ БМТ Иқтисодий ва ижтимоий кенгаши (ЭСОСОС) ва БМТнинг Атроф-муҳит бўйича дастури (ЮНEП) ҳузурида аккредитациядан ўтган кузатувчи мақомига эга. У Осиё, Яқин Шарқ, Африка, Европа ва АҚШнинг 90 дан ортиқ таҳлилий тузилмалари билан ҳамкорлик алоқаларини ўрнатган.