Ўзбекистонда имтиёзли шартларда пенсияга чиқиш ҳуқуқини берувчи касблар рўйхати тасдиқланди

Тошкент, Ўзбекистон (UzDaily.uz) — Вазирлар Маҳкамаси белгиланган муддатдан олдин пенсияга чиқиш ҳуқуқини берувчи касб ва лавозимлар рўйхатини тасдиқлади.

Имтиёзли шартларда пенсияга чиқиш ҳуқуқи 20 йилдан ками бўлмаган меҳнат стажига эга бўлган кончилик соҳаси ходимларига, ер ости ва очиқ кон ишларида 25 йиллик тажрибага эга бўлган ишчиларга, шунингдек, учувчилар ва парвоз-синов ҳайъати аъзоларига берилади. Бу тизимга кўра, эркаклар камида 25 йиллик, аёллар эса 20 йиллик иш стажига эга бўлиши лозим.

Шунингдек, театр, балет ва цирк артистлари — категориясига қараб 20–30 йиллик ижодий фаолият тажрибасига эга бўлган ҳолда, ҳамда 20 йиллик спорт тажрибасига эга бўлган профессионал спортчилар ҳам имтиёзли тартибда пенсияга чиқиш ҳуқуқига эга бўладилар.

Бундан ташқари, уруш ногиронлари ва болалигидан ногирон фарзанд тарбиялаётган оналарга ҳам имтиёзли пенсия белгиланади.

Касб турига қараб пенсия ёши инобатга олинмаган ҳолда ёки белгиланган муддатдан 5–10 йил олдин тайинланиши мумкин.

Ҳужжатга кўра, корхона ва ташкилотлар иш шароити ва меҳнатнинг шикастланиш хавфи даражасини инобатга олган ҳолда янги касбларни рўйхатга киритиш бўйича таклифлар бериш ҳуқуқига ҳам эга бўлади.