Тошкент, Ўзбекистон (UzDaily.uz) — Ўзбекистон Президенти Шавкат Мирзиёев «Иккинчи жаҳон урушидаги ғалабанинг 80 йиллиги» ёдгорлик юбилей медалини таъсис этиш ҳақида фармон имзолади.

Бу мукофотга Иккинчи жаҳон урушида иштирок этган Ўзбекистон фуқаролари, шунингдек, уларга тенглаштирилган шахслар сазовор бўладилар. Хусусан, бу медаль 1941–1945 йилларда «Германия устидан қозонилган ғалаба учун» ва «Япония устидан қозонилган ғалаба учун» каби мукофотлар билан тақдирланган, шунингдек, ҳарбий хизматдаги фидокорона меҳнати учун бошқа орден ва медаллар билан мукофотланган шахсларга берилади. Бундан ташқари, уруш қатнашчиси ёки Ватан уруши ногирони гувоҳномасига эга шахслар ҳам ушбу медалга сазовор бўладилар.

Шунингдек, мазкур медаль Иккинчи жаҳон уруши йилларида Ғалабага ҳисса қўшган меҳнат фронти фахрийлари учун ҳам мўлжалланган. Улар қаторига «1941–1945 йиллардаги Буюк Ватан урушида фидокорона меҳнати учун», «Меҳнат шуҳрати учун», «Меҳнатдаги муваффақиятлари учун» медаллари билан тақдирланганлар ёки 1941–1945 йилларда Қуролли Кучлар тизимида шартнома асосида ёлланган штатли лавозимларда ишлаган шахслар киради.

Мукофотланувчилар рўйхати Мудофаа вазирлиги, Ички ишлар вазирлиги, Давлат хавфсизлик хизмати ҳамда Бандлик ва камбағалликни қисқартириш вазирлиги ҳамда Иқтисодиёт ва молия вазирлиги ҳузуридаги бюджетдан ташқари Пенсия жамғармаси томонидан тасдиқланади.

Тантанали медал топшириш маросими 9 май — Хотира ва қадрлаш кунида бўлиб ўтади. Мукофот билан бирга фахрийларга бир марталик пул мукофоти ҳам тақдим этилади.