Тошкент, Ўзбекистон (UzDaily.uz) — Ўзбекистон Савдо-саноат палатаси раисининг биринчи ўринбосари Даврон Курбанов Жаҳон франчайзинг ассоциациясининг Шарқий Европа ва Марказий Осиё давлатлари бўйича вакили Антон Гладких билан учрашув ўтказди.

World Franchise Associates (WFA) — халқаро франчайзинг соҳасида етакчи консалтинг ва маркетинг компанияси бўлиб, унинг асосий вазифаси франчайзерларга янги халқаро бозорларга киришда ёрдам бериш ва инвесторларга етакчи брендларнинг франчайзинг имкониятларини тақдим этишдан иборат. Унинг мижозлари орасида Earl of Sandwich, Fastsigns, Popeyes, Doner Kebab каби брендлар мавжуд.

Суҳбат чоғида Ўзбекистонда франчайзинг бозорини ривожлантириш ва инвестицияларни жалб қилиш имкониятлари, маҳаллий брендларни халқаро бозорларга олиб чиқиш, халқаро брендларни Ўзбекистон бозорига киритиш ва маҳаллий франчайзинг компанияларини ривожлантириш ҳамда ҳамкорлик келишувларини шакллантириш имкониятлари муҳокама қилинди.

А. Гладких халқаро франчайзинг брендлари ва хизматларини жорий этиш Ўзбекистон иқтисодиётини диверсификация қилиш, экспорт салоҳиятини ошириш ва мамлакатнинг глобал бозордаги рақобатбардошлигини мустаҳкамлашда муҳим ўрин тутишини таъкидлади.

Шунингдек, томонлар WFA билан ҳамкорлик мамлакатнинг халқаро бозорларга интеграциясини янада мустаҳкамлаш ва иқтисодий ривожланишда янги имкониятлар эшигини очишга хизмат қилиши мумкинлигини қайд этди.