Тошкент, Ўзбекистон (UzDaily.uz) — Ўзбекистон Адлия вазирлиги электрон тижорат соҳасида курьерлик хизматлари фаолиятини тартибга солувчи янги низомни рўйхатдан ўтказди. Бу ҳақда вазирликнинг ҳуқуқий ахборот каналида маълум қилинди.

Ушбу ҳужжат Истиқболли лойиҳалар миллий агентлиги томонидан ишлаб чиқилган бўлиб, илк бор курьерларнинг ҳуқуқий мақоми, ҳуқуқ ва мажбуриятларини аниқ белгилаб беради.

Низомга кўра, курьерлар — бу тадбиркорлар ёки етказиб бериш хизматлари билан меҳнат шартномаси ёки фуқаролик-ҳуқуқий шартнома асосида товарлар етказиб бериш билан шуғулланувчи шахслар ҳисобланади. Шунингдек, электрон тижорат хизматлари билан тўғридан-тўғри ҳамкорлик қилувчи ўзини ўзи банд қилган шахслар ҳам ушбу тоифага киради.

Ҳужжатнинг муҳим жиҳатларидан бири — етказиб бериш хизматлари ва курьерларга, шартномада белгиланган бўлса, товарлар ёки/ва етказиб бериш хизмати учун тўловни харидордан қабул қилиш ҳуқуқининг берилиши ҳисобланади. Бироқ бу жараёнда касса техникасидан фойдаланиш мажбурий бўлиб, қоғоз ёки электрон чек ёхуд квитанция берилиши талаб этилади.

Айнан озиқ-овқат маҳсулотлари етказиб берилишида санитария нормаларига алоҳида эътибор қаратилади. Доставкага жалб этилган автомашиналар ва термоконтейнерлар тозалиги таъминланган ва техник жиҳатдан соғлом ҳолатда бўлиши керак. Курьерлар ва курьерлик хизматлари фойдаланилаётган ускуналарни мунтазам ювиш ва дезинфекция қилиш мажбуриятига эга.

Хавфсизлик ва махфийликни таъминлаш мақсадида, курьерларга етказилаётган товарларнинг қопламасини очиш қатъиян тақиқланади. Шунингдек, харидорларнинг шахсий маълумотлари ва етказиб беришга оид маълумотларни, қонун ҳужжатларида белгиланган ҳолатлардан ташқари, учинчи шахсларга бериш мумкин эмас.

Ушбу низомнинг жорий этилиши Ўзбекистонда жадал ривожланаётган онлайн савдо фонида электрон тижоратга бўлган ишончни ошириш, курьерлар фаолияти учун ягона стандартларни жорий этиш ва истеъмолчилар ҳуқуқларини ҳимоя қилишни кучайтиришга қаратилган.