Ўзбекистонда даромад хатоси туфайли ҚҚСни бекор қилиш тартиби тасдиқланди

Тошкент, Ўзбекистон (UzDaily.uz) — Ўзбекистонда қўшилган қиймат солиғи (ҚҚС) тўловчиси гувоҳномасининг амал қилишини тўхтатиш тартиби белгиланди. Ушбу тартиб гувоҳнома белгиланган даромад чегарасидан ошиб кетиш билан боғлиқ техник ёки бошқа хатолик туфайли автоматик равишда берилган ҳолатларга тааллуқли.

Аввалроқ, Вазирлар Маҳкамасининг 2021 йил 22 сентябрдаги 595-сон қарорига 1-илова билан тасдиқланган Низомнинг 37-бандига тегишли ўзгартишлар киритилган эди.

Янгиланган меъёрлар солиқ тўловчининг солиқ даври учун жами даромади техник ёки бошқа хатолик сабаб 1 млрд сўмдан ошиб кетган ва бу ҳолат унинг ҚҚС тўловчиси сифатида автоматик рўйхатдан ўтишига олиб келган вазиятларни тартибга солади.

Амалдаги тартибга кўра, бундай ҳолатларда солиқ органи солиқ тўловчининг электрон аризасига асосан гувоҳнома амал қилишини тўхтатиш тўғрисида қарор қабул қилиши мумкин. Бу белгиланган шаклда расмийлаштириладиган махсус рўйхатдан ихтиёрий чиқиш жараёни ҳисобланади.

Гувоҳномани бекор қилиш тўғрисидаги қарор солиқ органи раҳбари ёки унинг ўринбосари томонидан қабул қилинади. Бунда ҳужжат илк берилган санасидан бошлаб ўз кучини йўқотади.

Мисол сифатида айланмадан солиқ тўловчи хато туфайли 1 млрд сўмдан ортиқ суммага чек ёки электрон ҳисоб-фактура расмийлаштирган ҳолат келтирилган. Бу эса тегишли ариза тақдим этилмасдан туриб, унинг ҚҚС тўловчиси сифатида автоматик рўйхатдан ўтишига сабаб бўлган.

Хатолик аниқлангач, солиқ тўловчи расмийлаштирилган ҳужжатларга тегишли тузатишлар киритади ва натижада товарларни реализация қилишдан олинган ҳақиқий даромади белгиланган чегарадан паст бўлиб чиқади.

Бундай ҳолда, тақдим этилган аризага асосан солиқ органи ҚҚС тўловчиси гувоҳномасини унинг берилган санасидан бошлаб бекор қилиш тўғрисида қарор қабул қилади.

Шундан сўнг солиқ тўловчи яна айланмадан олинадиган солиқ режимига қайтади.