Ўзбекистонда боғчалардаги оммавий заҳарланишдан кейин 182 бола даволанмоқда

Тошкент, Ўзбекистон (UzDaily.uz) — 28 сентябрь, якшанба куни эрталаб Тошкент вилоятида бир нечта давлат болалар боғчасида содир бўлган оммавий озиқ-овқат заҳарланишидан жабрланган 182 бола шифохоналарда даволанишни давом эттирмоқда.

Бу ҳақда Соғлиқни сақлаш вазирлиги ҳузуридаги Санитария-эпидемиологик осойишталик ва жамоат саломатлиги қўмитаси биринчи ўринбосари Нурмат Атабеков маълум қилди.

Заҳарланиш 24 сентябрда содир бўлган. Унинг сўзларига кўра, ўтказилган текширув натижасида барча беморларга ўткир гастроэнтерит ташхиси қўйилган. Жами 960 нафардан ортиқ бола шифохоналарга ётқизилган.

Атабеков таъкидлашича, касаллик кўп ҳолларда икки-уч кун давом этади ва тўғри даво муолажалари орқали тез тузалиб, болалар босқичма-босқич соғайиб чиқарилмоқда. Ўртача оғирликдаги ҳолатларда ҳам яхшиланиш кузатилмоқда. Жуда оғир ҳолатлар қайд этилмаган.

«Энг муҳими — барча болаларнинг даволаниши давлат назорати остида. Соғайиш динамикаси ижобийлигича қолмоқда», — деди Санэпидқўмита вакили.

Санитария қонунчилигини бузиш моддаси бўйича очилган жиноят иши доирасида етти киши қўлга олинган.

Улар орасида Shark Milk Product компаниясининг сут маҳсулотлари ишлаб чиқаришга масъул уч нафар раҳбари ҳамда болалар боғчаларига озиқ-овқат етказиб берган учта аутсорсинг компанияси вакиллари бор.