Ўзбекистонда айрим касалликлар мавжуд бўлган ҳолларда хавфсизлик камаридан фойдаланмасликка рухсат этилди

Тошкент, Ўзбекистон (UzDaily.uz) — Соғлиқни сақлаш вазирлиги автомобильда хавфсизлик камаридан фойдаланиш мумкин бўлмаган касалликлар ва ҳолатлар рўйхатини тасдиқлади.

Мазкур қоида Ҳукуматнинг «Йўл ҳаракати қоидаларини тасдиқлаш тўғрисида»ги қарорида мустаҳкамланган бўлиб, ушбу касалликлар мавжудлигини тасдиқловчи тиббий маълумотномага эга бўлган фуқаролар хавфсизлик камаридан фойдаланмаслик ҳуқуқига эга.

Рўйхатга ўмров суяги, кўкрак суяги, елка камари ва қовурғалар синишлари, чап ўмров суяги синиши, чап ўмров суягининг сохта бўғими ва умуртқа поғонасининг компрессион синиши бўйича ўтказилган операциялар киритилган.

Шунингдек, оғир ўпка касалликлари бўлган беморлар — ўпканинг сурункали обструктив касаллиги IV босқичи, бронхиал астманинг IV босқичи, ўпканинг интерстициал шикастланишлари, шунингдек ўпканинг бир қисми ёки бутунлай олиб ташланган ҳолатларида (лобэктомия, пневмонэктомия) ҳам озод этиш назарда тутилган.

Рўйхатга, шунингдек, сурункали юрак етишмовчилигининг III босқичи, оғир юрак-қон томир касалликлари, III даражали семириш (BMI ≥ 40), бўйи паст бўлиш (150 смдан паст), қўл ёки елка ҳаракатини чекловчи неврологик касалликлар, кўкрак соҳасидаги оғир аллергик ва дерматологик касалликлар, ўмров суяги, кўкрак суяги, елка, елка суяги ва қовурғалар соҳасида ички ёки ташқи имплантларнинг мавжудлиги, кўкрак қафаси ёки қорин бўшлиғида ўтказилган очиқ операциялар, стоманинг мавжудлиги ҳамда кўкрак қафасида йирик ўсмалар киритилган.

Тиббий маълумотнома бир йил муддатга берилади, бироқ ўпканинг бир қисми ёки бутунлай олиб ташланган фуқаролар ҳамда бўйи паст бўлган шахслар учун маълумотнома муддатсиз расмийлаштирилади. Синишлар ёки операциялар ҳолатида маълумотнома муддати индивидуал тартибда, икки ойдан бир йилгача белгиланади.

QR-кодга эга электрон тиббий маълумотнома «Электрон соғлиқни сақлаш» ахборот тизими орқали расмийлаштирилади ва бемор бириктирилган бирламчи тиббий-санитария ёрдами тиббиёт ташкилоти ёки даволаниш ўтказилган муассаса томонидан берилади.

Бундан ташқари, маълумотнома бемор даволанган нодавлат тиббиёт клиникасининг хулосаси асосида ҳам бирламчи тиббий-санитария ёрдами ташкилоти томонидан берилиши мумкин.