Тошкент, Ўзбекистон (UzDaily.uz) — 3–10 март кунлари Ўзбекистонда Халқаро хотин-қизлар кунига бағишланган «Аёлга ҳурмат» ҳафталиги ўтказилади. Бу ҳақда Оила ва аёллар қўмитаси маълум қилди.

Тадбирлар Вазирлар Маҳкамаси протоколига мувофиқ ташкил этилиб, аёлларни қўллаб-қувватлаш, уларнинг ҳуқуқларини ҳимоя қилиш, ижтимоий, иқтисодий ва сиёсий фаоллигини ошириш, шунингдек, бандлик ва тадбиркорликни ривожлантиришга қаратилган.

Ҳафталик доирасида ислоҳотларнинг амалий натижаларига бағишланган медиатанловлар ҳамда тантанали учрашувлар ташкил этилади.

Тадбирлар давомида 890 номзод орасидан жамоат ва давлат ҳаётида фаол иштирок этган 331 нафар аёл «Мўтабар аёл» кўкрак нишони билан тақдирланади.

«Аёллар дафтари» ва «Ёшлар дафтари»га киритилган аёллар, шунингдек, фахрийлар «Янги Ўзбекистон» боғи, музейлар, театрлар, кино ва концертларга имтиёзли асосда ташриф буюриш имкониятига эга бўладилар.

Ҳафталик доирасида аёлларни қўллаб-қувватлаш ва ижтимоий фаоллигини оширишга қаратилган китоб ва буклетлар тақдимотлари ўтказилади. Мактаб ўқувчилари орасида «Она – оиламиз рамзи, меҳр манбаи» мавзусида иншолар танлови ташкил этилади.

Ижтимоий тармоқларда ёшлар иштирокида «Аёлга ҳурмат – меҳр ва адолат белгиси», «Она – меҳр манбаи», «Онам билан фахрланаман», «Менинг юрт равнақига ҳиссам» каби флешмоб ва челленжлар ўтказилади.

«Сен ҳар доим эътибор марказидасан!» шиори остида маҳаллаларда «тиббий автобуслар» фаолият юритади. Улар орқали ижтимоий ёрдамга муҳтож аёллар батафсил тиббий кўрикдан ўтиш имкониятига эга бўладилар.

Ахлоқ тузатиш муассасаларида маданий-маърифий тадбирлар ўтказилади. Оила ва аёллар қўмитаси ҳузуридаги «Оқила аёллар» ҳаракати ва «Аёл маърифати» жамоат кенгаши аъзолари иштирокида «Аёл маънавияти», «Она бўлиш бахти», «Муаммоли вазиятлар ва оқилона ечимлар», «Мулоқот психологияси», «Соғлом овқатланиш» ва «Соғлом турмуш тарзи» каби мавзуларда маҳорат дарслари ва тренинглар ташкил этилади.

Шунингдек, маҳаллаларда тикиш-бичиш, ошпазлик ва боғдорчилик бўйича маҳорат дарслари ҳам ўтказилади.

«Азиз юртдош аёлларимиз, қимматли қизларимиз, „Аёлга ҳурмат“ ҳафталиги тадбирларида фаол иштирок этинг!» – деб чақириқ қилди қўмита.

Кўплаб давлатларда Халқаро хотин-қизлар куни анъанавий равишда тенглик ва камситишга қарши акциялар, маршлар ҳамда солидарлик тадбирлари билан нишонланади.