Ўзбекистонда автомобиллар сотуви 336,6 мингдан ошди

Тошкент, Ўзбекистон (UzDaily.uz) — 2025 йилнинг январ—октябрь ойлари давомида Ўзбекистонда 336 631 та автомобиль сотилди, деб хабар берди «Ўзавтосаноат» компанияси.

Ички бозорда етакчиликни UzAuto Motors сақлаб қолган бўлиб, компания 162 677 та автомобиль сотган. Бу умумий сотувнинг 48,3 фоизига тўғри келади.

Унинг шўба корхонаси Khorezm Auto 116 541 та автомобиль сотиб, иккинчи ўринни эгаллади. Бу бозор улушининг 34,6 фоизини ташкил этади. Якунда UzAuto Motors’нинг бозордаги жами улуши 82,9 фоизга тенг бўлди.

Учинчи ўринга ADM Jizzakh 36 650 та автомобил сотиш билан чиқди. Бу умумий сотувнинг 10,9 фоизини ташкил қилади.

Бошқа ишлаб чиқарувчилар орасида BYD Uzbekistan Factory 19 266 та автомобиль (5,7 фоиз) сотилгани билан ажралиб туради. Кейинги ўринларда Asaka Motors — 1 042 та (0,3 фоиз), SamAuto — 376 та (0,11 фоиз) ва Alyans Auto — 79 та (0,02 фоиз) жойлашди.

Брендлар орасида мутлақ етакчи Chevrolet бўлиб, у 279 218 та автомобилни сотган. Иккинчи ўринда 20 594 та автомобил сотган KIA, ундан кейин 19 266 та билан BYD, 9 106 та билан Chery, 6 950 та билан Haval, 863 та билан Hyundai ва 376 та билан Isuzu D-Max қайд этилган.

Моделлар бўйича энг катта талаб Chevrolet Cobalt’га бўлиб, 98 976 та сотилган. Ундан кейин Chevrolet Damas (88 735) ва Chevrolet Tracker (36 957) турган.

Энг оммабоп ўнликка шунингдек Chevrolet Labo (27 806), Chevrolet Onix (24 849), KIA Sonet (15 072), BYD Song Plus DM-i Champion (5 727), BYD Yuan Up (5 007), BYD Chazor (3 988) ва Haval M6 (3 800) кирган.