Ўзбекистонда 44 тоннадан ортиқ юк машиналари ва самосваллари учун алоҳида рақамлар жорий этиш таклиф қилинди

Тошкент, Ўзбекистон (UzDaily.uz) — Ўзбекистонда оғир юк автомобиллари ва самосваллари учун алоҳида давлат рақамларини жорий этиш, шунингдек уларнинг тунги вақтда йўл четида тўхтаб туриши учун жавобгарлик белгилаш таклиф этилмоқда. Бу ҳақда жамоатчилик муҳокамаси учун эълон қилинган Вазирлар Маҳкамаси қарори лойиҳасида айтиб ўтилган.

Ҳужжатга кўра, «YUK» белгисига эга бўлган I3 турдаги рақамлар 44 тоннадан ортиқ массага эга бўлган N3 тоифали юк ва махсус автомобиллар учун мўлжалланган бўлади. Улар қизил фонга эга бўлиб, ҳарф ва рақамлар оқ рангда ёзилади. Рақамнинг чап томонида ҳудуд коди, ўнг томонида эса Ўзбекистон байроғи ва «UZ» белгиси жойлаштирилади.

«KON» белгисига эга бўлган I5 турдаги рақамлар эса самосваллари учун мўлжалланган бўлиб, ўхшаш услубда тайёрланади. «L», «M», «O» каби ҳарфли кодлар транспорт воситалари сонига қараб белгиланади.

Ички ишлар вазирлиги маълумотларига кўра, сўнгги 15 йил ичида мамлакатда юк автомобиллари сони 146 мингтадан 391 мингтагача ошган. Бу ҳолат йўлларга тушаётган юкламани кескин кўпайтириб, йўл инфратузилмасининг барқарорлиги учун жиддий муаммога айланган. Вазирлик таъкидлаганидек, янги давлат рақамлари оғир транспорт воситаларини умумий ҳаракат оқимидан ажратиб кўрсатиш ва йўлларнинг тез ескиришини камайтиришга ёрдам беради.

Шунингдек, қарор лойиҳасида юк машиналарининг тунги вақтда йўл четида тўхтаб туриши учун жавобгарлик белгилаш ҳам назарда тутилган. Фақат 2024 йилнинг ўзида бундай ҳолатлар натижасида 113 та йўл-транспорт ҳодисаси содир бўлган бўлиб, уларда 47 киши ҳалок бўлган.