Тошкент, Ўзбекистон (UzDaily.uz) — Ўзбекистонда микрогидроэлектростанциялар (микроГЭС) тармоғини ривожлантириш режалаштирилмоқда.

Ўзбекистон Президенти “Республика ҳудудларида микрогидроэлектростанциялар тармоғини ривожлантириш бўйича қўшимча чора-тадбирлар тўғрисида”ги қарорни имзолади.

Ҳужжатга мувофиқ, 2025–2026 йилларда мамлакат ҳудудларида умумий қуввати 164 МВт бўлган 2 983 та микроГЭС қурилиши режалаштирилган. Ушбу станциялар йилига 500 миллион кВт·соат экологик тоза электр энергияси ишлаб чиқариши кутилмоқда, бу эса 280 минг нафар аҳолини электр энергияси билан таъминлаш имконини беради.

Қурилиш босқичида 1 200 та вақтинчалик иш ўрни яратилади, станциялар ишга туширилгандан сўнг эса 520 та доимий иш ўрни пайдо бўлади.

2025 йил 1 майга қадар лойиҳа ҳужжатлари асосида микроГЭС қурилиши учун танлаб олинган ер участкалари Энергетика вазирлигига берилади. Вазирлик эса ушбу ерларни лойиҳа ташаббускорларига 20 йил муддатга ижарага тақдим этади.

Кичик ва микроГЭСлар соҳасидаги дастурларни амалга оширишни мувофиқлаштириш учун махсус лойиҳа гуруҳи ташкил этилади.