Ўзбекистонда 2026 йил март ойидан электромобил хариди учун имтиёзли кредитлар жорий этилиши мумкин

Тошкент, Ўзбекистон (UzDaily.uz) — Ўзбекистонда 2026 йил 1 мартдан электромобилларни сотиб олиш учун имтиёзли кредитлаш тизимини жорий этиш режалаштирилмоқда.

Мазкур чора-тадбирлар Ўзбекистон Республикаси Президентининг «Маҳаллани ривожлантириш ва жамиятни юксалтириш» йилида устувор йўналишлар бўйича ислоҳотлар дастурлари ва «Ўзбекистон – 2030» стратегияси тўғрисидаги фармон лойиҳасида назарда тутилган.

Ҳужжат лойиҳасига кўра, мамлакат ҳудудида ишлаб чиқарилган электромобилларни харид қилиш учун банк кредитлари бўйича фоиз ставкаси йиллик 12 фоиз этиб белгиланиши таклиф этилмоқда.

Хориждан импорт қилинадиган электромобиллар учун эса фоиз ставкаси 16 фоизни ташкил этади.

Шу билан бирга, ушбу кредитлар бўйича фоиз тўловларининг бир қисмини Давлат бюджети ҳисобидан қоплаб бериш режалаштирилмоқда.

Механизмга кўра, аҳолига электромобил хариди учун кредитлар ажратаётган тижорат банкларига фоиз ставкасининг оширилган қисми компенсация қилиб берилади. Бу эса қарз олувчиларнинг молиявий юкини камайтириш ва экологик тоза транспортга бўлган талабни рағбатлантиришга хизмат қилади.

Лойиҳада, шунингдек, электромобиллар учун инфратузилмани ривожлантириш чоралари ҳам кўзда тутилган. Хусусан, электромобилларни қувватлаш вақтида электр энергияси нархининг бир киловатт-соат учун 300 сўмдан ошган қисмини бюджет ҳисобидан қоплаб бериш таклиф этилмоқда.

Қувватлаш станциялари барпо этаётган тадбиркорларга «Тадбиркорликни ривожлантириш компанияси» АЖ орқали йиллик 10 фоиз ставкада мақсадли кредитлар ажратиш режалаштирилган. Шунингдек, қувватлаш станциялари жойлаштириш учун ер участкаларини бозор нархидан икки баравар арзон нархда аукционлар орқали сотиш таклиф этилмоқда.

Алоҳида чоралар блоки ўзини ўзи банд қилган шахс сифатида рўйхатдан ўтган ва такси хизматлари кўрсатаётган фуқароларга тааллуқли. Улар учун ижтимоий солиқ тўлашда 30 фоизгача чегирма бериш, давлат ташкилотларига қарашли пулли автотураргоҳлардан, жумладан аэропорт ва вокзал автотураргоҳларидан 30 дақиқагача бепул фойдаланишга рухсат этиш таклиф қилинмоқда.

Шунингдек, ҳуқуқбузарликлар ва йўл-транспорт ҳодисаларисиз жами 1 миллион километр масофада такси хизмати кўрсатган ҳайдовчиларни «Табиат ҳимоячиси» кўкрак нишони билан тақдирлаш амалиётини жорий этиш назарда тутилмоқда.

Кутилишича, ушбу чора-тадбирларни амалга ошириш электромобиллар бозорининг жадал ривожланишига, чиқиндиларнинг камайишига ва мамлакатда барқарор транспорт инфратузилмасининг шаклланишига хизмат қилади.

Ўзбекистон ҳукумати 2030 йилга қадар мамлакатдаги енгил автомобиллар умумий паркда электромобиллар улушини 10 фоизга етказишни режалаштирмоқда.