Ўзбекистонда 12 та компания устун музокара кучига эга эканлиги эътироф этилдиЎзбекистонда 12 та компания устун музокара кучига эга эканлиги эътироф этилди

Тошкент, Ўзбекистон (UzDaily.uz) — Ўзбекистоннинг барча ҳудудларида рақобатни ривожлантириш қўмитасининг ҳудудий бошқармалари томонидан ўтказилган кенг кўламли таҳлилий тадқиқотлар натижасида ўн икки та тадбиркорлик субъекти устун музокара кучига эга эканлиги аниқланди.

Таҳлил доирасида асосий товар ва молиявий бозор иштирокчиларининг фаолияти ҳамда маиший чиқинди йиғиш ва чиқиндиларни чиқариш ҳамда темир йўл линияларини фойдаланишга тақдим қилиш соҳасидаги рақобат муҳити ўрганилди.

Текширув натижасига кўра, Ўзбекистон Республикасининг “Рақобат тўғрисида”ги Қонуннинг 14-моддасига асосан, Рақобат қўмитаси ҳудудий органларининг тегишли буйруқлари билан айрим хўжалик юритувчи субъектларни ўзларига бириктирилган ҳудудларда устун музокара кучига эга деб эътироф этди.

Тошкент вилоятида маиший чиқинди йиғиш ва чиқариш хизматлари соҳасида мазкур мақомга «Zangiota Obodon», «Rahnamo Servis» ва «Angren Bunyod Fayz» масъулияти чекланган жамиятлари эга эканлиги белгиланди. Фарғона вилоятида ҳам шу соҳада фаолият юритувчи «Maxsus Garant Avto Servis» ва «Vodiy Maxsus Sanitar Trans» компаниялари устун музокара қудратига эга эканлиги аниқланди.

Сурхандарё вилоятида шу мақом «Surxondaryo viloyati Toza Hudud», шунингдек «Bio Texno Eko» МЧЖ, «Bio-Tex-Eko» МЧЖ ва унинг Сариосиё ҳамда Узун туманларидаги филиаллари, «Qiziriq-Invest» МЧЖ ва «Sale Kingdom» МЧЖга берилди.

Темир йўл линияларидан фойдаланиш хизматлари соҳасида эса устун музокара қудратига эга компания сифатида «Petromaruz Uzbekistan» МЧЖ, Сырдарё вилоятида эса «Ulug‘bek Yangiyer Qurilish» МЧЖ эътироф этилди.

Устун музокара қудратига эга деб топилган тадбиркорлик субъектларининг тўлиқ рўйхати Рақобатни ривожлантириш қўмитасининг расмий веб-сайтида эълон қилинган бўлиб, 2026 йил 23 январ ҳолатига мос келади.

Маълумот учун айтиш жоизки, Ўзбекистон Республикасининг “Рақобат тўғрисида”ги Қонуннинг 14-моддасига кўра, устун мавқега эга бўлмаган хўжалик юритувчи субъект ёки шахслар гуруҳи томонидан битим шартлари, товарлар сотиладиган ҳудуд ёки нархга бир томонлама таъсир кўрсатиш имконияти мавжуд бўлса, бундай ҳолат устун музокара кучи деб эътироф этилади.