Ўзбекистон Яқин Шарқдаги ўт очишни тўхтатишни қўллаб-қувватлади

Тошкент, Ўзбекистон (UzDaily.uz) — Ўзбекистон Республикаси Ташқи ишлар вазирлиги Яқин Шарқда Покистон раҳбарияти воситачилигида эълон қилинган тўлиқ ўт очишни тўхтатиш ва сулҳ ўрнатилишини қўллаб-қувватлашини билдирди.

Расмий баёнотда таъкидланишича, мазкур қарор кескинликни пасайтириш ва ўзаро мақбул ечимларни топишга қаратилган сиёсий-дипломатик мулоқот учун шароит яратиш йўлида муҳим қадам ҳисобланади.

Ўзбекистон барча томонларни вазминлик кўрсатишга, янги кескинликларга олиб келиши мумкин бўлган ҳаракатлардан тийилишга ва минтақада барқарор тинчлик ҳамда хавфсизликка эришиш учун конструктив ҳамкорликни давом эттиришга чақирди.

Шунингдек, баёнотда мамлакатнинг низоларни фақат тинч йўл билан, Бирлашган Миллатлар Ташкилоти Низоми тамойилларига қатъий мувофиқ тарзда ҳал этиш зарурлиги ҳақидаги ўзгармас позицияси таъкидланди.

Дональд Трамп Эрон билан икки ҳафталик ўт очишни тўхтатишга розилик билдирди, бунгача Теҳрон манзилига «жазо» ҳақида таҳдидлар билдирилганига қарамай. Томонлар шундай келишувни муҳокама қилишни режалаштирмоқдаки, унга кўра Эронга нисбатан барча санкциялар бекор қилинади, у етказилган зарар учун компенсация олади ва Ормуз бўғози устидан назоратни сақлаб қолади.

Ўзининг ультиматуми якунланишига бир неча соат қолганда Трамп АҚШ Эронга қарши операцияда барча ҳарбий вазифаларни «ортиғи билан бажарганини» маълум қилди ва Покистон ташаббуси билан илгари сурилган сулҳни қўллаб-қувватлади. Президент шундай деди: «Улар мендан Эронга вайронкор кучларни юборишдан тийилишни сўрашди ва агар ислом республикаси Ормуз бўғозини тўлиқ, дарҳол ва хавфсиз очишга рози бўлса, мен бомбардимон ва ҳужумларни икки ҳафтага тўхтатишга тайёрман».

Вашингтон Теҳрондан ўн бандига эга тинчлик таклифини олди, уни Трамп мулоқот учун мақбул асос деб баҳолади. Барча келишилмаган масалалар икки ҳафта ичида ҳал қилиниши керак, шундан сўнг якуний келишув имзоланади. Музокараларнинг биринчи босқичи 10 апрель куни Исломобод шаҳрида ўтказилиши режалаштирилган.

Эрон ўт очишни тўхтатишни тасдиқлаб, буни «катта ғалаба» деб атади. Расмий баёнотда шундай дейилади: «Душман Эрон халқига қарши олиб борган хиёнаткор, ноқонуний ва жиноий урушида инкор этиб бўлмас, тарихий ва ҳалокатли мағлубиятга учради».