Тошкент, Ўзбекистон (UzDaily.uz) — Экология, атроф-муҳитни муҳофаза қилиш ва иқлим ўзгариши вазирлиги томонидан Саудия Арабистонининг "Vision International Investment" (VIIC) ва Франциянинг "Suez international" компаниялари билан ҳамкорлик тўғрисида битим имзоланди.

Битимларга Экология вазири ўринбосари Жусипбек Казбеков, "Vision International Investment" компаниясининг ривожланиш бўйича бош директори Капил Лалвани ҳамда "Suez international" компаниясининг Европа ва Марказий Осиё бўйича бош директори Паул Боурдиллон имзо чекишди.

Мазкур битим хавфли саноат чиқиндиларини бошқариш бўйича истиқболли лойиҳани ишлаб чиқиш ва амалга ошириш бўйича ҳамкорликни кўзда тутади. Лойиҳанинг умумий қиймати 78 млн АҚШ долларига тенг бўлиб, уч босқичда амалга оширилади. Биринчи босқичда чиқиндиларни барқарорлаштириш ва полигонларга жойлаштириш мажмуалари ҳамда минтақавий узатиш станцияларини яратиш кўзда тутилган бўлса, иккинчи босқичда чиқиндидан ёқилғи олиш (RDF — Refuse-derived fuel) ускунаси, ёқиш иншоотлари ва иссиқлик билан ишлов бериш корхонасининг муҳандислик олди лойиҳасини ишлаб чиқиш ва тажриба асосида синовдан ўтказиш режалаштирилган. Учинчи босқичда эса тўлиқ миқёсдаги чиқиндидан ёқилғи олиш, иссиқлик билан ишлов бериш иншоотини барпо этиш ва ишга тушириш мақсад қилинган.

"Suez international", асосан, сув ва чиқиндиларни бошқаришга ихтисослашган, 160 йилдан ортиқ тарихга эга Франция компанияси ҳисобланади. У бутун дунёда сув таъминоти ва тозалаш, оқова сувларни бошқариш, шунингдек, чиқиндиларни қайта ишлаш, жумладан, хавфли чиқиндиларни бошқариш бўйича ечимлар таклиф қилади. Компания Европа, Осиё-Тинч океани минтақаси, Америка, Африка ва Яқин Шарқ минтақаларида кўплаб саноат тармоқларига хизмат кўрсатади.

"Vision International Investment Company" (VIIC) 2002 йилда Саудия Арабистонида ташкил этилган йирик инвестиция холдинги бўлиб, 96 миллиард АҚШ доллари атрофидаги активларни бошқаради. Фаолият йўналишлари энергетика, инфратузилма, коммунал хизматлар, сув ресурсларини бошқариш, электр энергияси ишлаб чиқариш, консалтинг ҳамда давлат-хусусий шериклик лойиҳаларини қамраб олади. 

Мазкур битимлар стратегик ҳамкорликни чуқурлаштириш ва, албатта, экологик вазиятни яхшилашга хизмат қилади.