Ўзбекистон ва ЮНEСКО мактабгача таълим марказини ташкил қилади

Тошкент, Ўзбекистон (UzDaily.uz) — Мактабгача ва мактаб таълими вазири Эъзоза Каримова Париж шаҳрида ЮНEСКО ташкилоти Бош директори Ҳошим Ал-Анани билан учрашди.

Тадбир доирасида Тошкентда ЮНEСКО шафелигидаги II-тоифали “Мактабгача таълимни ривожлантириш минтақавий маркази”ни ташкил этиш тўғрисидаги битим имзоланди.

Ушбу ташаббус 2025 йил ноябрь ойида Самарқанд шаҳрида бўлиб ўтган ЮНEСКО Бош конференцияси 43-сессиясининг очилиш маросими доирасида Ўзбекистон Республикаси Президенти Шавкат Мирзиёев томонидан билдирилган эди.

Осиё ва Тинч океани минтақасида илк бора ташкил этилаётган ушбу марказ:

мактабгача таълим соҳасидаги ислоҳотларни халқаро тажриба ва экспертиза билан қўллаб-қувватлайди;

Ўзбекистонни эрта ёшдаги таълим соҳасида минтақавий «хаб» сифатида шакллантиради;

БМТнинг Барқарор ривожланиш мақсадларидан 4.2-maqsadi (барча болалар учун сифатли эрта ривожланиш ва тайёрлов таълими) ижросини жадаллаштиради.

Учрашув давомида Бош директор Ҳошим Ал-Анани Ўзбекистон Республикаси Президенти Шавкат Мирзиёевнинг ЮНEСКО билан ҳамкорликни мустаҳкамлаш борасидаги саъй-ҳаракатларини алоҳида таъкидлаб, давлат раҳбарининг халқаро таълим, маданият ва фан соҳасидаги ташаббускорлигини юксак баҳолади.