Тошкент, Ўзбекистон (UzDaily.uz) — 2024 йилнинг 14-15 декабрь кунлари "Ўзбекистон темир йўллари" АЖ бошқаруви раисининг биринчи ўринбосари Х.Рахметов Хитой Халқ Республикасида бўлиб, бир қатор муҳим учрашувлар ўтказди. Хусусан, илк бор Шинжон-Уйғур автоном районидаги "Чина Railway Urumqi Bureau Group" раҳбари Го Сзян, шунингдек, Ланюнган шаҳридаги "Ланюнган порт компаниялар гуруҳи" МЧЖ партия қўмитаси котиби ўринбосари ва порт президенти Ван Гуочао билан музокаралар олиб борди. Кун тартибида ҳамкорлик истиқболлари, мултимодал ташувларни ташкил этиш, Ўзбекистон ва Хитой ўртасида юк айланмасини кўпайтириш, шунингдек, контейнерли блок-поездларни шакллантириш масалалари муҳокама қилинди.

Ташриф доирасида муҳим ютуқларга эришилди, жумладан, "Темирйўлкарго" АЖнинг Хитойдаги биринчи ваколатхонаси очилди. Ушбу воқеа Жамият учун катта аҳамиятга эга, чунки у халқаро иштирокини кенгайтиради ва мултимодал ташишларни ривожлантириш учун янги имкониятларни очади.

Шу билан бирга, Хитой Халқ Республикасининг чегара пунктларида вагон ва контейнерларнинг кечикиши ва туриб қолиши масалалари муҳокама қилинди.

Томонлар ўз ҳудудларида контейнер поездлари ва вагонлар қатновининг тезлашуви ва ҳаракатланишини йўлга қўйиш мақсадида мунтазам равишда учрашувлар ўтказишга келишиб олдилар.

Музокаралар якунида юк ташиш ҳажмини ошириш учун синергияни тўлдириш мақсадида "Чина Railway Urumqi Bureau Group" ва "Ланюнган порт компаниялари гуруҳи" МЧЖ ўртасида ҳамкорлик тўғрисида келишувга эришилди.