Тошкент, Ўзбекистон (UzDaily.uz) — Ҳокимлар малакасини ошириш дастури доирасида Ўзбекистон делегацияси Туркиянинг маҳаллий ҳокимият ва бизнес вакиллари билан қатор ишчи учрашувлар ўтказди. Учрашувлар шаҳар режалаштириш ва саноат ривожланиши бўйича илғор тажрибаларни ўрганишга қаратилди.

Ўзбекистон делегациясига «Юксалиш» ҳаракати раиси, Олий Мажлис Қонунчилик палатаси қўмита раиси Бобур Бекмуродов раҳбарлик қилди.

Ташриф давомида Гебзе шаҳри мери Зиннур Буюкгўз билан учрашув бўлиб ўтди. Унда замонавий шаҳарсозлик ва урбанизация жараёнларининг асосий йўналишлари муҳокама қилинди. Кун тартибида шаҳар бошқарувида рақамлаштириш, "ақлли шаҳарлар" концепциясини ривожлантириш ҳамда саноат зоналарини шаҳар муҳитига интеграция қилиш масалалари кўриб чиқилди.

Бундан ташқари, делегация аъзолари эътиборига саноат кластерларини бошқаришнинг муваффақиятли моделлари, кичик ва ўрта бизнесни қўллаб-қувватлаш механизмлари ҳамда инвестицияларни жалб этиш стратегиясини ўз ичига олган Гебзе саноат зонаси тажрибаси ҳавола этилди. Тадбирда Гебзе саноат зонаси президенти Алп Челикбилек ва Гебзе Савдо палатаси президенти Абдураҳмон Асланташ иштирок этди.

Мазкур учрашувлар Ўзбекистон ва Туркия ўртасида шаҳарсозлик, саноатни ривожлантириш ва инновацион ечимларни жорий этиш соҳаларидаги ҳамкорликни мустаҳкамлаш йўлида муҳим қадам бўлди. Делегация таркибига Навоий, Шаҳрисабз, Самарқанд, Фарғона ва Янги Наманган тумани ҳокимлари кирди. Улар Турк дунёси муниципалитетлари иттифоқи аъзолари ҳисобланади.

Турк дунёси муниципалитетлари иттифоқи (ТДББ) 2003 йил 12 ноябрь куни Вазирлар Маҳкамаси қарори билан ташкил этилган бўлиб, туркий тилли мамлакатлар ва ҳудудлар ўртасида шаҳар бошқаруви соҳасида ҳамкорликни ривожлантириш мақсадини кўзлайди. Тарихий, маданий ва географик қадриятлар асосида бирлашган ушбу ташкилот маҳаллий ҳокимият органлари ўртасидаги ҳамкорликни мустаҳкамлашга қаратилган лойиҳаларни фаол амалга оширади. ТДББ таркибида 30 та мамлакатдан 1200 га яқин муниципалитет бор.

Ҳокимларнинг малака ошириш доирасида олган тажрибаси шаҳарларда замонавий стандартларни жорий этиш, аҳолининг турмуш сифатини ошириш ва бизнес юритиш учун қулай шароитлар яратиш бўйича режаларга асос бўлади.