Тошкент, Ўзбекистон (UzDaily.uz) — 2025 йил 31 июль куни Ўзбекистон Республикаси инвестициялар, саноат ва савдо вазири Лазиз Кудратов Қатарнинг йирик инвестиция компанияси — Protocol Capital Group ижрочи раиси Аҳмад Абдулла Ал-Жуфайри билан учрашув ўтказди.

Protocol Capital Group — 4 миллиард АҚШ долларидан ортиқ активларга эга бўлган, 34 дан ортиқ мамлакатда мингдан зиёд лойиҳаларни амалга оширган, йирик инвестиция компанияси ҳисобланади. Компания кўчмас мулк, нефть-газ саноати, сувни сақлаш ва ҳавони совутиш тизимлари, қурилиш материаллари ва пўлат ишлаб чиқариш, ҳамда фармацевтика саноатига йўналтирилган лойиҳаларни молиялаштириш билан шуғулланади.

Учрашув давомида томонлар иқтисодиётнинг асосий тармоқларида ҳамкорликни кенгайтириш истиқболларини муҳокама қилдилар. Қатар томонига Ўзбекистонда яратилган инвестицион муҳитнинг амалий жиҳатлари ҳамда истиқболли лойиҳавий таклифлар тақдим этилди.

Аҳмад Ал-Жуфайри Ўзбекистон билан шерикликнинг катта салоҳиятини эътироф этиб, энергетика, уй-жой қурилиши, транспорт, логистика ва IТ соҳаларида лойиҳаларга сармоя киритишга қизиқиш билдирди. Рақамлаштириш ва инфратузилмани ривожлантириш, барқарор ўсишга хизмат қилувчи таклифларни ишлаб чиқиш йўлида ҳамкорликни давом эттиришга тайёрлик билдирилди.