Тошкент, Ўзбекистон (UzDaily.uz) — Жорий йилнинг 22 май куни Ўзбекистон Республикаси Президенти Ш. М. Мирзиёевнинг Словенияга расмий ташрифи доирасида Любляна шаҳрида икки давлатнинг 150 га яқин етакчи компаниялари, молия ва бизнес ташкилотлари раҳбарлари ва тегишли вазирликлари раҳбарлари иштирокида Словения-Ўзбекистон бизнес-форуми бўлиб ўтди.

Форумда Словения Республикаси Иқтисодиёт, туризм ва савдо вазири Матяж Хан, Ўзбекистон Республикаси инвестициялар, саноат ва савдо вазири ўринбосари Акрам Алиев, икки мамлакат вазирлик ва идоралари, тармоқ бирлашмалари ва Савдо-саноат палаталари раҳбарлари иштирок этди.

Акрам Алиев ўз нутқида Словенияда Словения барқарор ривожланиб, саноат ва энергетикасига инновацияларни фаол жалб қилиб келаётгани ҳамда Ўзбекистоннинг улкан саноат, ресурс ва экспорт салоҳиятига асосланган икки мамлакат ишбилармон доиралари ўртасида тўғридан-тўғри муносабатлар ўрнатиш муҳимлигини таъкидлади.

Ўзаро товар айирбошлашда ижобий тенденция кузатилмоқда: агар 2024 йил якунига кўра товар айирбошлаш ҳажми 176 миллион долларни ташкил этган бўлса, жорий йилнинг биринчи чорагида бу кўрсаткич 127 миллион доллардан ошди. Хизмат кўрсатиш, тайёр тўқимачилик маҳсулотлари, кимё маҳсулотлари, механик қурилмалар, тош, керамика ва гипсдан тайёрланган буюмлар, мебель ва бошқалар асосий ўринларни эгаллайди.

Шу билан бирга, спикер икки мамлакат иқтисодиётлари имкониятларини таҳлил қилиш асосида ҳамкорликни ривожлантиришнинг энг истиқболли йўналишларига алоҳида тўхталиб ўтди. Гап қишлоқ хўжалиги, озиқ-овқат маҳсулотлари, фармацевтика, кабель ва сим маҳсулотлари ишлаб чиқариш, гидроэлектр станцияларини қуриш каби соҳаларда юқори қўшимча қийматга эга маҳсулотлар ишлаб чиқариш бўйича қўшма лойиҳаларни амалга ошириш ҳақида бормоқда.

Шу билан бирга, инвесторлар манфаатларига жавоб берадиган, мамлакат иқтисодиётини сифат жиҳатидан ўзгартириш ва барқарорлигини мустаҳкамлашга хизмат қилувчи янги қўшма ташаббусларни ҳар томонлама қўллаб-қувватлашга тўлиқ тайёрлик билдирилди.

Ўз навбатида, Словения Республикаси Иқтисодиёт, туризм ва савдо вазири Матяж Хан форумда сўзга чиқиб, Ўзбекистонда амалга оширилаётган ислоҳотлар кўламини юқори баҳолаб, словениялик тадбиркорларни Ўзбекистон бозорига фаол кириб боришга чақирди.

Форум давомида B2B ва G2B тарзидаги учрашувлар ташкил этилиб, бу икки мамлакат ишбилармон доиралари вакилларига ўзаро тажриба алмашиш ва ҳамкорликнинг истиқболли йўналишларини ўрганиш учун ноёб имконият яратди.

Тадбир давомида инвестициявий ҳамкорлик, фармацевтика, шаҳар инфратузилмасини қуриш, мис маҳсулотлари ишлаб чиқариш, мева-сабзавот маҳсулотларини сақлаш ва қайта ишлаш, темир йўл инфратузилмасини ривожлантириш, микро ГEСлар қуриш, шунингдек, электротехника саноатининг бошқа соҳаларида муносабатларни янада ривожлантириш ва қўшма лойиҳаларни амалга оширишга қаратилган бир қатор келишув ва шартномалар алмашилди.

Форум дастури Ўзбекистон Республикаси Президенти Ш. М. Мирзиёевнинг ташрифи билан давом этди.