Ўзбекистон ва Sasol газ-кимё лойиҳаларини ривожлантиришни муҳокама қилишди

Тошкент, Ўзбекистон (UzDaily.uz) — 15 март куни Тошкентда Ўзбекистон Республикаси ИССВ вазири Лазиз Кудратов Жанубий Африканинг “Sasol Limited” компанияси ижрочи вице-президенти доктор Сарушен Пиллай билан учрашди.

Музокаралар давомида томонлар газ-кимё ва кўмир-кимё саноатида ҳамкорликни кенгайтириш истиқболларини муҳокама қилдилар. Суҳбат жорий йил февраль ойида Кейптаун шаҳрида бошланган мулоқотнинг мантиқий давоми экани таъкидланди. Кўмир ва табиий газни чуқур қайта ишлаш ҳамда юқори қўшилган қийматга эга маҳсулотлар ишлаб чиқаришга қаратилган қўшма лойиҳаларни амалга оширишга тайёрлик билдирилди.

«Sasol» компаниясининг Coal-to-Olefins (CTO) лойиҳасини амалга оширишда ҳамда Узбекистан ГТЛ мажмуасини янада ривожлантириш доирасида технологик ҳамкорлик қилиш, жумладан ишлаб чиқариш қувватларини кенгайтириш ва илғор қайта ишлаш технологияларини жорий этишда компания иштироки муҳокама қилинди.

Sasol Limited - 1950 йилда ташкил этилган Жанубий Африка энергетика ва кимё компанияси. Компанияда қарийб 28,1 минг нафар ходим фаолият юритади. Умумий активлари тахминан $22 млрд, 2024 йил якунлари бўйича даромади эса $16,6 млрд ташкил этади. Компания фаолияти 22 та давлатни қамраб олади, жумладан Жанубий Африка, Мозамбик, АҚШ, Германия, Италия ва Словакияни.