Ўзбекистон ва Россия туризм соҳасидаги ҳамкорликни мустаҳкамламоқда

Тошкент, Ўзбекистон (UzDaily.uz) — 2025 йил 26 ноябрь куни Тошкентда Ўзбекистон Республикаси ва Россия Федерацияси ўртасидаги Иқтисодий ҳамкорлик бўйича ҳукуматлараро комиссия доирасида Туризм соҳасидаги ҳамкорлик бўйича қуйи комиссиянинг учинчи йиғилиши бўлиб ўтди.

Ўзбекистон Республикаси Туризм қўмитаси раисининг биринчи ўринбосари Д. Абдусаламов ва Россия Федерацияси Иқтисодий ривожланиш вазирининг ўринбосари Д. Вахруков раислигида ўтказилган мазкур йиғилишда икки давлатнинг тегишли идоралари, сайёҳлик ташкилотлари, таълим муассасалари ҳамда тадбиркорлик субъектлари вакиллари иштирок этдилар.

Томонлар илгари эришилган келишувларнинг бажарилишини, 2025-2026 йилларга мўлжалланган ҳамкорлик дастурининг амалга оширилишини ва "Россияда Ўзбекистон туризми йили" доирасида ўтказилган тадбирлар натижаларини муҳокама қилдилар, шунингдек, ўзаро сайёҳлик алмашинувининг ижобий ўсиш суръати қайд этилди.

Учрашув якунида томонлар қўшма сайёҳлик маҳсулотларини янада ривожлантириш, таълим дастурларини такомиллаштириш, транспорт қулайлигини ошириш ва маркетинг фаолиятини кучайтириш бўйича ҳамкорликни давом эттиришга тайёрликларини билдирдилар.