Тошкент, Ўзбекистон (UzDaily.uz) — Ўзбекистон ва Россия Федерацияси компаниялари сунъий интеллект (СИ) асосида илғор технологияларни биргаликда ишлаб чиқиш ва жорий этишга қизиқиш билдирмоқда. Бу ҳақда Ўзбекистон Республикаси Рақамли технологиялар вазирлиги департаменти бошлиғи Сарвар Садуллаев Sputnik Uzbekistan халқаро матбуот марказида бўлиб ўтган матбуот анжуманида маълум қилди.

«Томонлар сунъий интеллект соҳасида технологияларни ривожлантириш мақсадида қўшма ишчи гуруҳ тузишга қизиқиш билдиришди», — деди Садуллаев Россиянинг IT-компаниялари билан ҳамкорлик истиқболлари ҳақидаги саволга жавобан.

Унинг сўзларига кўра, яқинда Ўзбекистонга Россиянинг етакчи IT-компаниялари делегациясининг ташрифи доирасида маҳаллий ишланмалар ва сунъий интеллектни турли соҳаларга жорий этиш бўйича режалар тақдим этилди. Россиялик мутахассислар ўзбекистонлик мутахассисларнинг ишланмаларини юксак баҳолаб, уларнинг Россия бозорида ҳали мавжуд бўлмаган ноёб ечимларга эга эканлигини таъкидлашди.

«Улар Ўзбекистонда Россияда ҳали мавжуд бўлмаган технологиялар борлигини алоҳида қайд этишди. Шунинг учун Россия томони фақат ечимларни харид қилиш эмас, балки уларни биргаликда ривожлантиришни таклиф қилди», — дея қўшимча қилди вазирлик вакили.

Аввалроқ, июль ойи бошида Ўзбекистон Республикаси Президенти Шавкат Мирзиёев тегишли вазирлик ва идораларга миллий сунъий интеллект моделини ишлаб чиқиш, шунингдек, рақамли технологиялар соҳасида бир миллион малакали мутахассис тайёрлашни топширган эди.

Ушбу ташаббус мамлакатнинг рақамли иқтисодиётини жадал ривожлантириш ва технологик суверенитетини мустаҳкамлашга қаратилган.