Ўзбекистон ва Россия креатив иқтисодиётни ривожлантириш бўйича баённома имзолади

Тошкент, Ўзбекистон (UzDaily.uz) — Санкт-Петербург шаҳрида Креатив иқтисодиёт бўйича халқаро конференция доирасида Ўзбекистон Маданият ва санъатни ривожлантириш жамғармаси ва Россия Федерациясининг Стратегик ташаббуслар агентлиги ўртасида Ҳамкорлик тўғрисидаги баённома имзоланди.

Ҳужжатни Ўзбекистон Маданият ва санъатни ривожлантириш жамғармаси раиси Гаяне Умерова ва Стратегик ташаббуслар агентлиги бош директори Светлана Чупшева имзоладилар.

Битим Россиянинг 67 та ҳудудида аллақачон қўлланилаётган тартибга солишнинг энг яхши амалиётлари, методологик асос ва таҳлилий воситаларни ўз ичига олган Креатив саноатни ривожлантириш минтақавий стандартини Ўзбекистонга мослаштириш ва жорий этишни назарда тутади.

Ушбу келишув Ўзбекистон ва Россия ўртасида креатив иқтисодиёт соҳасидаги шерикликни мустаҳкамлашда муҳим қадам бўлиб, тажриба алмашиш, қўшма тадқиқотларни ўтказиш ҳамда креатив саноат тармоқларини ривожлантириш стратегияларини ишлаб чиқиш учун янги имкониятларни очади.