Тошкент, Ўзбекистон (UzDaily.uz) — Ўзбекистон ва Қирғизистон «Бишкек» эркин иқтисодий зонаси ҳудудида тиббий буюмларни қўшма тарзда ишлаб чиқаришни йўлга қўйишни режалаштирмоқда. Бу ҳақда Ўзбек-Қирғиз ривожланиш жамғармаси (ЎҚРЖ) хабар берди.

Лойиҳа Ўзбекистон Республикаси Фармацевтика соҳасини ривожлантириш агентлиги ва Соғлиқни сақлаш вазирлиги делегацияси ҳамда жамғарма вакиллари учрашувида муҳокама қилинди. Ишлаб чиқариш қувватлари «Санрайд» компанияси томонидан ташкил этилади. Маҳсулотнинг асосий истеъмолчилари Қирғизистоннинг тиббиёт муассасалари — шифохоналар ва поликлиникалар бўлади.

ЎҚРЖ лойиҳани молиялаштириш шартларини ишлаб чиқиш ва инвестиция жалб этиш бўйича маслаҳат ёрдамини кўрсатади.

Айни вақтда Ўзбекистон ва Қирғизистон соғлиқни сақлаш соҳасида 14 та қўшма лойиҳани амалга оширмоқда.