Ўзбекистон ва Қирғизистон савдо-иқтисодий ҳамкорликни кенгайтиришга келишиб олдилар

Тошкент, Ўзбекистон (UzDaily.uz) — Бишкек шаҳрида ўтаётган CAREC бизнес-форуми доирасида ИССВ раҳбари Лазиз Кудратов Қирғиз Республикаси иқтисодиёт ва савдо вазири Бакит Сидиков билан учрашди. Томонлар савдо-иқтисодий ҳамкорликни кенгайтириш ва қўшма ташаббусларни илгари суриш истиқболларини муҳокама қилдилар.

Ижобий динамика қайд этилди: 2025 йил январь–сентябрь ойларида ўзаро товар айирбошлаш 14,7% га ошиб, $672,8 млнга етди, 2024 йил якунида эса $846,1 млнни ташкил этди. Саноат кооперацияси дастури ва стратегик ташаббуслар рўйхатини тайёрлаш бўйича келишувга эришилди.

Томонлар муносабатларни янада чуқурлаштириш ҳамда юқори даражадаги яқинлашиб келаётган ташриф олдидан ўзаро мувофиқлаштиришни давом эттиришга тайёрлигини билдирдилар.

Икки томонлама долзарб кун тартиби алоҳида кўриб чиқилди: раҳбариятнинг ўзаро ташрифлари, Ҳукуматлараро комиссия фаолияти, минтақалараро алоқаларни ривожлантириш, савдони кенгайтириш ва логистика салоҳиятидан фойдаланиш масалалари муҳокама қилинди.

Саноат кооперацияси лойиҳалари, Ўзбекистон–Қирғизистон фонди фаолияти, Қирғизистонда автотехника ишлаб чиқариш, энергетика ташаббуслари ва минтақавий транспорт лойиҳаларини амалга ошириш кўриб чиқилди.