Тошкент, Ўзбекистон (UzDaily.uz) — Жорий йилнинг 24 февраль куни Ўзбекистон Республикаси Иқтисодиёт ва молия вазири ўринбосари Илҳомжон Умрзаков Полша тараққиёт ва технологиялар вазири ўринбосари Михал Ярос бошчилигидаги делегация вакиллари билан учрашув ўтказди.

Полша делегацияси таркибида Давлат активлари вазири ўринбосари, Дори воситалари бошқармаси раиси ўринбосари, Бизнес-омбудсман, Инвестициялар ва савдо агентлиги президенти, шунингдек, Полшанинг тармоқ идоралари ҳамда ишбилармон доиралари етакчи мутахассислари иштирок этди. Музокаралар икки мамлакат ўртасидаги иқтисодий алоқалар ва савдо бўйича ҳамкорликни мустаҳкамлаш ҳамда кенгайтириш масалаларига қаратилди.

Томонлар ўзаро манфаатли иқтисодий ҳамкорликни ривожлантиришнинг кенг қамровли йўналишларини, жумладан, хусусийлаштириш, банк сектори, фармацевтика саноати, геология ва бошқа соҳаларни муҳокама этди. Полша томони юқорида кўрсатилган йўналишларда Ўзбекистон билан тажриба алмашишга тайёрлигини билдирди.

Бундан ташқари, Ўзбекистон томони ҳудудларни ривожлантириш, шунингдек, энергия самарадорлиги соҳасида Полша тажрибасини ўрганишга қизиқиш билдирди.

Якунда Полша томони Ўзбекистон иқтисодиётининг турли соҳаларига сармоялар жалб этишга фаол қизиқиш билдириб, қўшма корхоналар ташкил этиш ва илғор технологияларни жорий қилишга алоҳида эътибор қаратди. Бу, ўз навбатида, янги иш ўринларини яратиб, иккала мамлакат иқтисодиётининг рақобатбардошлигини оширади.

Ушбу учрашув икки томонлама муносабатларни мустаҳкамлашда муҳим қадам бўлиб, давлатларнинг барқарор иқтисодий ўсиши ва аҳоли турмуш даражасини юксалтиришга хизмат қиладиган чуқур ҳамкорлик учун янги имкониятларни очиб беради.