Тошкент, Ўзбекистон (UzDaily.uz) — Ўзбекистон Савдо-саноат палатаси раҳбарияти ва мебель ишлаб чиқарувчи маҳаллий тадбиркорлик субъектлари вакиллари Покистоннинг "Decent Furnishers" мебель ишлаб чиқариш корхонасига ташриф буюрди.

"Decent Furnishers" корхонаси Гужранвала шаҳрида жойлашган бўлиб, 1948 йилдан бери ўз фаолиятини юритиб келмоқда. Покистон бўйлаб 4 та заводлари мавжуд. Умумий ишчилар сони 800 дан ортиқни ташкил этади. Корхона маҳсулотлари экспорти Шимолий ва Жанубий Америка ҳамда Марказий Осиё давлатларига амалга оширилади.

Ташриф давомида корхона вакиллари томонидан соҳага доир маълумотлар тақдим этилиб, ишлаб чиқариш жараёни ўрганилди. Шунингдек, тадбиркорларни қизиқтирган саволларга батафсил жавоблар олинди.

Шу билан бирга, мамлакатимизда мебельчилик соҳасида белгиланган устувор вазифалар доирасида икки давлат ўртасидаги ҳамкорликни кенгайтириш масалалари муҳокама қилинди ва фикр алмашилди.