Тошкент, Ўзбекистон (UzDaily.uz) — Жорий йилнинг 27-29 январь кунлари Ўзбекистон Савдо-саноат палатаси раиси Даврон Вахабов бошчилигидаги делегация Покистон Ислом Республикасининг Карачи ва Лаҳор шаҳарларига ташрифи амалга оширилмоқда.

Ташрифнинг илк кунида, Карачи шаҳрида жойлашган NLC (National Logistics Cell) корхонаси раҳбарияти билан учрашув ўтказилди.

NLC (National Logistics Cell) — Покистондаги етакчи логистика ва транспорт компанияси бўлиб, автомобиль, темир йўл ва денгиз транспорти орқали юкларни самарали ва ишончли етказиб беришни таъминлайди. Шунингдек, NLC инновацион логистика марказлари ва замонавий порт инфратузилмасига эга бўлиб, минтақавий савдо алоқаларини ривожлантиришда муҳим аҳамиятни касб этади.

Учрашув давомида Ўзбекистон ва Покистон ўртасидаги савдо-иқтисодий ҳамкорликни янги босқичга олиб чиқишга қаратилган долзарб масалалар муҳокама қилинди.

Хусусан, Термез-Карачи транспорт коридорини ташкил этиш, Термезда NLC логистика портини ташкил қилиш имкониятлари, икки томонлама алоқаларни мустаҳкамлаш ва минтақавий иқтисодий ҳамкорликни ривожлантириш йўналишларида ҳамкорлик истиқболлари муҳокама қилинди.

Учрашув якунлари бўйича икки мамлакат ўртасида савдо ва транспорт алоқаларини мустаҳкамлашга қаратилган қўшма қадамлар келишиб олинди.