Ўзбекистон ва Ookla интернет-инфратузилмасини ривожлантириш бўйича янги лойиҳаларни муҳокама қилди

Тошкент, Ўзбекистон (UzDaily.uz) — Малайзияга ташриф доирасида Куала Лумпур шаҳрида Рақамли технологиялар вазирлиги вакиллари ва “Ўзбекистон телекоммуникация тармоқларини бошқариш республика маркази” ДУК директори У. Шакиров ва Ookla компаниясининг катта савдо директори Виктор Зенг ўртасида учрашув ўтказилди.

Музокараларда мавжуд қўшма лойиҳалар, шунингдек, Ўзбекистонда RootMetrics ташаббусини ва Ookla'нинг янги “Ookla Certified” хизматини йўлга қўйиш имкониятлари муҳокама қилинди. 

Шунингдек, Ookla компанияси интернет инфратузилмасини ривожлантириш ҳамда сифат мониторингини кучайтиришга қаратилган ечимларини тақдим этди.
 
Ўз навбатида, компания вакиллари Ўзбекистоннинг сўнгги йилларда мобил ва симли интернет тезлиги кўрсаткичлари бўйича катта ютуқларга эришганини эътироф этдилар.

Бундан ташқари, учрашувда Оокла компанияси "O‘zTTBRM" ДУКнинг Drive-Test ускуналаридан фойдаланишга қизиқиш билдирди.

Учрашув якунида томонлар келгусида ўзаро ҳамкорликни янада мустаҳкамлаш ва қўшимча лойиҳаларни амалга ошириш масалаларини муҳокама қилдилар.

Ookla – глобал интернет тезлигини ўлчаш ва таҳлил қилиш билан шуғулланувчи етакчи халқаро компания бўлиб, 2006 йилда ташкил этилган. Компания ўзининг  Speedtest платформаси орқали бутун дунё бўйлаб фойдаланувчиларга интернет тезлигини синовдан ўтказиш имкониятини тақдим этади.