Тошкент, Ўзбекистон (UzDaily.uz) — 2025 йил 30 январь куни Ўзбекистон Республикаси Иқтисодий ривожланиш ва молия вазири ўринбосари Илҳом Умрзаков Монголия делегацияси вакиллари билан учрашув ўтказди.

Монголия делегацияси таркибига Бош вазир ўринбосарининг энергетика масалалари бўйича маслаҳатчиси Жамба Лхагва, Бош вазир маслаҳатчиси Ирмуун Демберел, Молия вазирлигининг стратегия ва режалаштириш бўйича бош директори Ерен-Улзий Батмунх ва бошқа расмий шахслар кирди. Ўзбекистон томонидан учрашувда Иқтисодий ривожланиш ва молия вазирлиги масъул ходимлари иштирок этди.

Учрашув давомида икки мамлакат иқтисодиётида амалга оширилаётган тизимли ислоҳотлар муҳокама қилинди, айниқса, энергетика соҳасини ривожлантириш масаласига алоҳида эътибор қаратилди.

Томонлар энергетика хавфсизлиги ва барқарор ривожланиш борасидаги долзарб масалаларни кўриб чиқдилар. Ўзбекистонда амалга оширилаётган энергетика соҳасидаги ислоҳотлар Монголия делегациясида катта қизиқиш уйғотди. Улар энергия нархлари шаклланиши, бозор барқарорлиги ва энергетика бозорини ривожлантириш бўйича Ўзбекистон тажрибасини ўрганишга тайёр эканликларини маълум қилдилар.

Шунингдек, учрашувда «яшил» энергетика соҳасидаги лойиҳалар муҳокама қилинди. Икки мамлакат экологик тоза ва барқарор технологияларни ривожлантириш борасида қизиқиш билдириб, карбонат ангидрид чиқиндиларини камайтириш ва экологик мувозанатни сақлаш масалаларида ҳамкорликни йўлга қўйиш ниятида эканликларини таъкидладилар.

Бундан ташқари, давлат-хусусий шериклик (ДХШ) лойиҳалари ҳам муҳокама қилинди. Томонлар Ўзбекистонда муваффақиятли амалга оширилган ДХШ тажрибасини ўрганиш ва уни Монголия шароитида татбиқ этиш имкониятларини кўриб чиқдилар.

Учрашув якунида томонлар келгусидаги ҳамкорликни кенгайтириш ва мустаҳкамлаш борасидаги интилишларини тасдиқладилар.