Ўзбекистон ва Литва ўртасида иқтисодий ҳамкорлик муҳокама қилинди

Тошкент, Ўзбекистон (UzDaily.uz) — Ўзбекистон Савдо-саноат палатаси раиси маслаҳатчиси Алишер Шайхов Литва Ташқи ишлар вазири ўринбосари Таумарис Валис билан учрашув ўтказди.

Томонлар икки давлат ўртасидаги савдо, инвестиция ва инновация соҳаларидаги ҳамкорликни янада ривожлантиришга қаратилган имкониятларни кўриб чиқдилар.

Алишер Шайхов GSP+ преференциялари, Европа Иттифоқининг техник кўмак дастурлари ва таълим ҳамда инновация соҳасидаги қўшма лойиҳаларнинг аҳамиятини таъкидлади.

Шунингдек, қишлоқ хўжалиги, IT, киберхавфсизлик, логистика ва электрон тижорат бўйича ҳамкорликни кенгайтириш йўналишларини таклиф этди. Литванинг стартаплар ва венчур экотизимини ривожлантириш борасидаги тажрибаси Ўзбекистон учун муҳим экани айтилди.

Таумарис Валис Ўзбекистон билан амалий натижаларга қаратилган ҳамкорликни чуқурлаштиришга тайёрлигини билдириб, икки мамлакатнинг савдо-саноат палаталари ўртасида бизнес алоқаларини кучайтириш муҳимлигини қайд этди.

Учрашув якунида томонлар стартаплар, инновациялар, логистика ва рақамли технологиялар соҳаларида қўшма лойиҳаларни амалга оширишга тайёр эканликларини тасдиқладилар ҳамда бизнес ва инвестиция соҳасидаги алоқаларни янада ривожлантиришдан ўзаро манфаатдорликни билдирди.