Тошкент, Ўзбекистон (UzDaily.uz) — Жорий йилнинг 13 февраль куни Ўзбекистон Савдо-саноат палатаси раиси ўринбосарлари Дилшод Расулов ва Халимжон Сафаров Лаҳор Савдо-саноат палатаси вице-президенти Ҳалид Усман ҳамда Палатага аъзо корхоналар вакиллари билан учрашув ўтказишди.

Лаҳор Савдо-саноат палатаси 1923 йилда ташкил этилган бўлиб, Покистоннинг энг қадимий ва нуфузли савдо палаталаридан бири ҳисобланади. Ҳозирги кунда унинг 25 000 дан ортиқ аъзоси турли саноат ва хизмат кўрсатиш соҳаларида фаолият юритмоқда.

Учрашувда икки давлат ўртасидаги савдо-иқтисодий ҳамкорликни янада ривожлантириш, ишбилармонлик муҳитини яхшилаш ва тадбиркорлар учун мавжуд тўсиқларни бартараф этиш масалалари муҳокама қилинди. 

Шунингдек, мамлакатимизда амалга оширилаётган ислоҳотлар, тадбиркорлик фаолияти учун яратилган қулай шароитлар, Ўзбекистоннинг туризм ва саноат салоҳияти ҳақида атрофлича маълумотлар берилди.

Томонлар туризм соҳасидаги имкониятларни кенгайтириш, Ўзбекистон ва Покистон ўртасида авиақатновларни кўпайтириш, бизнес-инкубаторлар ташкил этиш ҳамда тадбиркорлар ўртасидаги ҳамкорликни янада чуқурлаштириш юзасидан фикр алмашдилар.

Учрашув якунида ишбилармонлар ўзаро алоқаларни ривожлантириш мақсадида ҳамкорлик дастурларини амалга ошириш, бизнес учун яратилган қулай шарт-шароитлардан унумли фойдаланиш ва икки томонлама савдо ҳажмини ошириш бўйича келишувларга эришдилар.