Ўзбекистон ва Корея Республикаси инвестиция ҳамкорлигини кенгайтирмоқда

Тошкент, Ўзбекистон (UzDaily.uz) — Ўзбекистон Республикаси Инвестициялар, саноат ва савдо вазири ўринбосари Илзат Касимов бошчилигидаги делегациянинг Корея Республикасига уюштирган ташрифи якунига етди.

Сафарнинг сўнгги кунида автомобилсозлик, электротехника, кимё, фармацевтика ва туризм соҳаларидаги 30 та етакчи компания вакиллари иштирокида давра суҳбати ташкил этилди.

Кореялик ҳамкорларга юртимизнинг инвестициявий салоҳияти намойиш этилиб, улар жорий йилнинг 16–19 июнь кунлари бўлиб ўтадиган 5-Тошкент халқаро инвестиция форумига таклиф қилинди.

Корея Экспорт-импорт банки (KEXIM) билан ўтказилган музокараларда соғлиқни сақлаш соҳасидаги ДХШ лойиҳалари, жумладан, тез тиббий ёрдам тизимини модернизация қилиш ва тиббий инфратузилмани янгилаш масалалари муҳокама қилинди.

Саноат ва технологик ҳамкорликни кенгайтириш мақсадида бозор етакчилари билан манзилли учрашувлар ўтказилди. Хусусан, DK Consultants компанияси билан ДХШ механизмлари орқали замонавий тиббий хизматларни жорий этиш бўйича келишувларга эришилди.

Daewoo E&C компанияси билан кечган мулоқотлар эса шаҳарсозлик ва йирик инфратузилма объектларини барпо этишдаги стратегик ташаббусларни амалга оширишга қаратилди.

Ташриф якунлари ҳар икки томоннинг ишбилармонлик алоқаларини чуқурлаштириш ҳамда янги юқори технологияли ишлаб чиқариш қувватларини ишга туширишга тайёрлик билдирилди.