Ўзбекистон ва Италия ижтимоий ҳимоя соҳасидаги ҳамкорликни кенгайтирмоқда

Тошкент, Ўзбекистон (UzDaily.uz) — Рим шаҳрида Ўзбекистон Республикаси Президенти ҳузуридаги Ижтимоий ҳимоя миллий агентлиги директори Мансурбек Оллоёровнинг Италия меҳнат ва ижтимоий сиёсат вазири хоним Марина Элвира Калдероне билан учрашуви бўлиб ўтди.

Томонлар миллий ва минтақавий даражадаги ижтимоий ҳимоя тизимларини, шунингдек, ҳамкорлик истиқболларини муҳокама қилдилар. Хусусан, ижтимоий хизматлар сифатини ошириш бўйича тажриба алмашиш, аҳолининг заиф қатламларини фаоллаштириш дастурларини ривожлантириш, ижтимоий суғурта тизимини такомиллаштириш ва ижтимоий ходимлар салоҳиятини мустаҳкамлаш масалалари муҳокама этилди.

Алоҳида эътибор Италия тажрибасига — инклюзив бандлик, касбий тайёргарлик ҳамда учинчи секторнинг ижтимоий хизматлар кўрсатишдаги иштирокига қаратилди.

Музокаралар давомида ҳамкорлик тўғрисида доиравий ҳужжат имзолаш имконияти ҳам кўриб чиқилди. Бу эса Ўзбекистон ва Италия ўртасида ижтимоий соҳада ҳамкорликни янада чуқурлаштириш йўлида муҳим қадам бўлиши таъкидланди.

Учрашув конструктив ва мазмунли руҳда ўтди ҳамда томонларнинг ўзаро мулоқотни мустаҳкамлаш ва қўшма ташаббусларни ривожлантиришга бўлган умумий манфаатдорлигини яна бир бор тасдиқлади.