Ўзбекистон ва Ислом ҳамкорлик ташкилоти янги туризм ташаббуслари бўйича келишиб олдилар

Тошкент, Ўзбекистон (UzDaily.uz) — “Ипак йўлида туризм” 30-Тошкент халқаро туризм ярмаркаси доирасида Ислом ҳамкорлик ташкилоти (ИҲТ) бош котибининг иқтисодий масалалар бўйича ўринбосари Ахмад Кавеса Сенгендо билан учрашув ўтказилди.

Музокаралар давомида томонлар ИҲТга аъзо давлатларнинг туризм соҳасидаги ҳамкорлигини янада кенгайтириш, жумладан, Ўзбекистоннинг ислом мероси ва зиёрат туризмини тарғиб қилиш бўйича ташаббусларини қўллаб-қувватлаш, туризм соҳасида кадрлар тайёрлаш сифатини ошириш, шунингдек, тегишли идоралар ўртасида қўшма таълим дастурларини яратиш ва тажриба алмашиш масалаларини муҳокама қилдилар.

Ахмад Кавеса Сенгендо Ўзбекистоннинг Халқаро туризм ҳафталиги ва илк бор ўтказилган ИҲТ туризм форумини муваффақиятли ташкил этиш борасидаги саъй-ҳаракатларини юқори баҳолаб, мамлакатимизнинг Ташкилот доирасидаги ҳамкорликни мустаҳкамлашдаги ўрни ортиб бораётганини таъкидлади.

Томонлар сайёҳлик алмашинувини мустаҳкамлаш, ислом маданий меросини тарғиб қилиш, иқтисодиёт ва туризм соҳаларида давлатлараро алоқаларни кенгайтиришга қаратилган янги ташаббусларни илгари суришга ўзаро тайёр эканликларини тасдиқладилар.