Тошкент, Ўзбекистон (UzDaily.uz) — Юртимиз элчихонаси кўмагида Ўзбекистон Вазирлар Маҳкамаси ҳузуридаги Техник жиҳатдан тартибга солиш агентлиги ва Буюк Британиянинг "Intertek" компанияси раҳбарияти ўртасида онлайн музокаралар ташкил этилди, деб хабар қилмоқда "Дунё" АА мухбири.

Суҳбат давомида мамлакатимизда ишлаб чиқарилаётган маҳсулотларнинг экспорт ҳажмини ошириш мақсадида "Intertek" компанияси билан уларни халқаро стандартлар асосида сертификатлаш, ёрлиқлаш ва қадоқлаш бўйича ҳамкорлик қилиш масалалари муҳокама қилинди.

Учрашув якунида муҳокама қилинган йўналишларда Ўзбекистон техник жиҳатдан тартибга солиш агентлиги ва "Intertek" компанияси ўртасида ҳамкорлик ўрнатишга келишиб олинди.

"Intertek Group plc" компанияси 1885 йилда Лондон шаҳрида ташкил этилган. У ўтган давр мобайнида нефть ва газ, энергетика, автомобиль саноати, қурилиш, электроника, озиқ-овқат саноати, тиббиёт ва бошқа йўналишларда маҳсулот ва хизматлар сифатини назорат қилиш, хавфсизлигини таъминлаш ва стандартлаштириш соҳасида жаҳонда етакчи бўлиб келмоқда. Компаниянинг 100 дан ортиқ мамлакатларда офислари, лабораториялари ва сертификатлаш марказлари бор.