Тошкент, Ўзбекистон (UzDaily.uz) — Айни кунларда «Паррандасаноат» уюшмаси вакилларидан иборат делегация Ҳиндистондаги Карнатака провинциясининг Бангалор шаҳрида бўлиб турибди.

Делегация вакиллари Ҳиндистоннинг Karnataka Poultry Farmers & Breeders Association (KPFBA) билан паррандачилик маҳсулотларини етиштиришда кооперация тизимини ўрганиш бўйича музокаралар ўтказди.

Ҳиндистондаги Карнатака провинциясида хўжаликлар ва томорқа ер эгалари ўртасида ўрнатилган кооперация тизими ҳисобига мамлакатда етиштириладиган парранда гўштининг 70 фоиз қисми етиштирилади. Сафар давомида ушбу жиҳатларни ўрганиш ва келгусида Ўзбекистон шароити учун маъқул томонларини ўзлаштириш режалаштирилмоқда.

Музокаралар натижасида Ҳиндистоннинг Karnataka Poultry Farmers & Breeders Association (KPFBA) билан Республикамиз ҳудудида хорижий тажрибаларни жорий этиш борасида ҳамкорлик меморандуми имзоланди.Меморандум доирасида паррандачилик соҳасида ўқитиш, лаборатория ва техник ёрдам, кичик фермерлар имкониятларини кенгайтириш, янги технологияларни қўллаш ва мониторинг қилиш бўйича икки томонлама ҳамкорлик ишлари амалга оширилади.

KPFBA – 1991 йилда ташкил этилган, Ҳиндистоннинг Карнатака провинциясида фаолият юритувчи етакчи паррандачилик уюшмаси бўлиб, илмий тадқиқотлар, ўқув дастурлари ва соҳа эҳтиёжларини қондириш билан шуғулланади.