Тошкент, Ўзбекистон (UzDaily.uz) — Ўзбекистон Республикаси Олий таълим, фан ва инновациялар вазирининг биринчи ўринбосари Шоҳрух Далиев бошчилигидаги делегациянинг Грузияга хизмат сафари давом этмоқда.

Ташриф доирасида делегация аъзолари Грузия техника университети ҳамда Телави Давлат университетига ташриф буюриб, ушбу олийгоҳларнинг ректорлари Давид Гургенидзе ва Шалва Чкадуа билан учрашди. Мулоқот чоғида Тошкент давлат аграр университети ҳамда Грузия техника университети ўртасида имзоланган меморандум асосида “Ипакчилик ва тутчилик” йўналиши бўйича «2+2» форматидаги қўшма таълим дастури ташкил этилгани қайд этилди.  

Музокаралар натижасида профессор-ўқитувчилар ва техник мутахассислар учун қисқа муддатли стажировкалар ташкил этиш, қўшма таълим дастурларини жорий этиш, қўшма илмий тадқиқот лойиҳаларини ишлаб чиқиш ва молиялаштириш учун аризалар тайёрлаш ҳамда талабалар алмашинувини йўлга қўйиш бўйича келишувларга эришилди.

Шунингдек, Грузия тажрибаси асосида биология ва биотехнология йўналишида кадрлар тайёрлаш тизимини шакллантиришга келишилди.  

Ташриф давомида Тошкент давлат иқтисодиёт университети ва Телави Давлат университети ўртасида туризм соҳаси бўйича ҳамкорлик шартномаси имзоланди. Бундан ташқари, Тошкент давлат аграр университети ва Телави Давлат университети ўртасида ҳамкорлик ҳужжати имзоланди. Ушбу келишув асосида “Узумчилик ва виночилик” мутахассислиги бўйича 1+1 шаклидаги қўшма таълим дастурини очиш режалаштирилди.  

Қайд этилганидек, мазкур ташриф олий таълим тизимида халқаро ҳамкорликни кенгайтириш ва Ўзбекистон олийгоҳларининг халқаро миқёсда интеграциясини мустаҳкамлашга хизмат қилади.