Тошкент, Ўзбекистон (UzDaily.uz) — Германия Иқтисодий ҳамкорлик ва тараққиёт федерал вазирлиги (BIZ) томонидан қўллаб-қувватланаётган “Ўзбекистонда хусусий секторга ёрдам бериш ва иқтисодий сиёсат бўйича маслаҳатлар” лойиҳаси доирасида Ўзбекистон Республикаси Иқтисодиёт ва молия вазири ўринбосари Умид Абидхаджаев ҳамда Германия халқаро ҳамкорлик жамиятининг (GIZ) Беате Шореит босчилигидаги делегация вакиллари ўртасида учрашув бўлиб ўтди.

Учрашувда EQuIP услубиятидан фойдаланган ҳолда саноат сиёсатини кузатиш ва баҳолаш тизимини ишлаб чиқиш, шунингдек, Ўзбекистоннинг саноат ривожланиш стратегиясини тайёрлаш масалалари бўлди.

Муҳокама давомида “яшил” стартапларни қўллаб-қувватлаш, университетлар ва саноат компаниялари билан ҳамкорликда амалга оширилаётган лойиҳалар, шунингдек, саноат корхоналарини трансчегаравий углеродни тартибга солиш механизмига тайёрлаш  бўйича ташаббуслар кўриб чиқилди.

“Ўзбекистонда хусусий секторга ёрдам бериш ва иқтисодий сиёсат бўйича маслаҳатлар” лойиҳаси Ўзбекистонни яшил саноатлаштириш ва энергия ҳамда ресурс тежамкор технологияларни жорий этишда қўллаб-қувватлашга қаратилган бўлиб, бу миллий барқарор иқтисодий ривожланишнинг стратегик мақсадларига мос келади. Учрашувда томонлар белгиланган мақсадларга эришиш ва иқтисодий сиёсат соҳасида самарали қарорларни амалга ошириш учун фаол ҳамкорликни давом эттиришга тайёрлигини тасдиқлади.

Лойиҳа кўп босқичли ёндашув асосида амалга оширилиб, давлат органлари, хусусий компаниялар, бизнес уюшмалари ва илмий-тадқиқот институтлари билан яқин ҳамкорликни ўз ичига олади. Асосий вазифалардан бири Ўзбекистонда экологик тоза технологияларни жорий этиш ва “яшил” саноатни ривожлантириш учун мустаҳкам пойдевор яратишдир.

“Ўзбекистонда хусусий секторга ёрдам бериш ва иқтисодий сиёсат бўйича маслаҳатлар” лойиҳаси ( Private sector development and economic policy advice in Uzbekistan” Project) Германия Федератив Республикасининг Иқтисодий ҳамкорлик ва тараққиёт федерал вазирлиги (BMZ) томонидан молиялаштирилади ҳамда Deutsche Gesellschaft für Internationale Zusammenarbeit (GIZ) GmbH кўмагида амалга оширилмоқда.