Тошкент, Ўзбекистон (UzDaily.uz) — Ўзбекистон Савдо-саноат палатаси раиси ўринбосари Дилшод Расулов ва Германиянинг “Halman GmbH” компанияси раҳбари Иляс Гужлу ўртасида учрашув бўлиб ўтди. Учрашув давомида қатор муҳим масалалар муҳокама қилинди.

Томонлар Германиянинг Франкфурт шаҳрида Ўзбекистон Савдо-саноат палатасининг ваколатхонасини ташкил этиш ташаббусини муҳокама қилишди. Бу ваколатхона икки давлат ўртасидаги савдо-иқтисодий муносабатларни мустаҳкамлаш, Ўзбекистон маҳсулотларини Германия ва Европа Иттифоқи бозорларида тарғиб қилишга қаратилган платформа бўлиб хизмат қилади.

Учрашув доирасида икки давлат тадбиркорлари ўртасида узоқ муддатли ҳамкорликни қўллаб-қувватлаш, ўзаро манфаатли лойиҳаларни ишлаб чиқиш ва амалга ошириш масалалари ҳам кўриб чиқилди. Бу ташаббуслар Ўзбекистон маҳсулотларининг халқаро бозорлардаги талабини оширишда муҳим аҳамият касб этади.

Учрашув якунида муҳокама қилинган масалаларни амалга ошириш ҳамда ҳамкорлик йўналишларини ривожлантириш учун қўшма ишчи гуруҳ тузишга келишиб олинди.