Ўзбекистон ва Эрон савдо-иқтисодий ҳамкорликни кенгайтириш масалаларини муҳокама қилишди

Тошкент, Ўзбекистон (UzDaily.uz) — 2025 йил 10 ноябрь куни Инвестициялар, саноат ва савдо вазири Лазиз Кудратов Эрон Ислом Республикасининг саноат, конлар ва савдо вазири Муҳаммад Атабак билан учрашди.

Томонлар савдо-иқтисодий алоқаларни кенгайтириш, қўшма лойиҳаларни амалга ошириш ва ўзаро манфаатли ҳамкорликни янада мустаҳкамлаш масалаларини муҳокама қилдилар.

Энергетика, транспорт, логистика, фармацевтика ва туризм соҳаларида кооперацияни ривожлантиришга алоҳида эътибор қаратилди. Қўшма ишлаб чиқаришларни ташкил этиш ҳамда маҳсулотларни минтақавий бозорларга олиб чиқиш бўйича амалий ташаббуслар кўриб чиқилди.

Учрашув якунида таъкидланганидек, 2024 йилда ўзаро савдо ҳажми 500 миллион долларни ташкил этди. 2025 йил 1 сентябрь ҳолатига кўра, Ўзбекистонда эрон капитали иштирокида 222 та корхона фаолият юритмоқда, улар қурилиш, транспорт ва фармацевтика соҳаларида лойиҳаларни амалга оширмоқда.

Учрашув конструктив руҳда ўтиб, икки мамлакат ўртасидаги амалий ҳамкорликни янада кенгайтириш ва иқтисодий алоқаларни мустаҳкамлаш йўлидаги муҳим қадам бўлди.