Тошкент, Ўзбекистон (UzDaily.uz) — 10 май куни Теҳрон шаҳрида Ўзбекистон Республикаси ва Эрон Ислом Республикаси ўртасидаги иқтисодий ҳамкорлик бўйича Ҳукуматлараро комиссиянинг 16-йиғилиши бўлиб ўтди.

Икки мамлакат делегацияларига Ўзбекистон Республикаси инвестициялар, саноат ва савдо вазири Лазиз Кудратов ҳамда Эрон Ислом Республикаси конлар, саноат ва савдо вазири Муҳаммад Атабак бошчилик қилди.

Кун тартибига мувофиқ, дастлаб делегация раҳбарларининг саноат кооперацияси, транспорт, логистика, савдо ва инвестиция лойиҳаларини амалга ошириш масалаларини муҳокама қилишга бағишланган икки томонлама учрашуви бўлиб ўтди. Олий даражадаги ташрифлар чоғида эришилган келишувларни амалга оширишга алоҳида эътибор қаратилди.

Устувор вазифалар муҳокама қилингандан сўнг Ҳукуматлараро комиссия йиғилиши ўз ишини бошлади. Унда Ўзбекистон-Эрон келишувларини амалга ошириш учун бевосита масъул бўлган вазирлик ва идоралар раҳбарларининг ҳисоботлари ва келгусидаги режалари тингланди.

Ўзаро товар айирбошлаш ҳажмини ошириш, жумладан, имтиёзли савдо келишувларидан самарали фойдаланиш, миллий маҳсулотлар кўргазмаларини ташкил этиш ва электрон тижорат имкониятларини кенгайтириш бўйича ўзаро чора-тадбирлар келишиб олинди.

Инвестициявий ҳамкорлик доирасида қишлоқ хўжалиги, озиқ-овқат саноати, ахборот технологиялари, кимё, тўқимачилик саноати, машинасозлик каби соҳаларда қўшма лойиҳаларни амалга ошириш бўйича келишувга эришилди. Шунингдек, транспорт алоқаларини ривожлантириш ва мамлакатлар ўртасида товарлар ҳаракатини соддалаштириш бўйича чора-тадбирлар ишлаб чиқилди.

Тадбир якунлари бўйича йиғилиш якуний баённомаси қабул қилинди.