Ўзбекистон ва Буюк Британия интеллектуал мулк экспертизасида сунъий интеллектни жорий этиш масалаларини муҳокама қилди

Тошкент, Ўзбекистон (UzDaily.uz) — Адлия вазири ўринбосари М. Икрамов бошчилигидаги Ўзбекистон Республикаси делегацияси Нюпорт шаҳрида Буюк Британия Интеллектуал мулк идораси бош директори Адам Уиллямс билан учрашув ўтказди.

Учрашувда интеллектуал мулк объектларига оид талабномаларни замонавий усуллардан фойдаланган ҳолда экспертизадан ўтказиш, ушбу жараёнга сунъий интеллект технологияларини жорий этиш, идораларнинг экспертиза қарорларини ўзаро тан олиш орқали ихтиро ва фойдали моделларни рўйхатдан ўтказиш муддатларини қисқартириш масалалари муҳокама қилинди.

Шунингдек, интеллектуал мулк объектларини тижоратлаштириш учун Буюк Британияда амалга оширилаётган ишлар, жумладан, интеллектуал мулкдан фойдаланишни ўргатишга, қўшимча даромад олишга, контрафакт маҳсулотларга қарши курашишга қаратилган "IP Partners", "ИП Ассесс", "IP Access" каби лойиҳаларни Ўзбекистонда амалга ошириш истиқболлари муҳокама қилинди.

Шу билан бирга, тадбир доирасида Буюк Британия бозорида аниқланган "Контрафакт маҳсулотлар кўргазмаси"да иштирок этилди ва контрафакт маҳсулотлар айланмасига қарши курашувчи Лондон полиция бўлинмаси фаолияти билан танишилди.

Учрашув якунида Лондон полиция бўлинмаси билан ҳамкорликда ҳуқуқ эгасига етказилган зарарни аниқлаш бўйича семинар ташкил этиш, Ўзбекистон Республикаси 2022-2026 йилларга мўлжалланган интеллектуал мулк стратегиясини 2027-2030 йилларда давом эттириш бўйича таклифларни биргаликда ишлаб чиқиш каби қўшма лойиҳаларни амалга оширишга келишиб олинди.