Ўзбекистон ва Беларусь савдо ва қишлоқ хўжалигида янги қўшма лойиҳаларни муҳокама қилди

Тошкент, Ўзбекистон (UzDaily.uz) — 2 март куни Минск шаҳрида ўзбек делегациясининг ишчи ташрифи доирасида Ўзбекистон Савдо-саноат палатаси раиси Даврон Ваҳабов ва Беларусь Савдо-саноат палатаси раиси Михаил Мятликов ўртасида ишчи учрашув бўлиб ўтди.

Мазкур учрашувни ташкил этиш бўйича келишув 2026 йил февраль ойида Беларусь делегациясининг Ўзбекистонга амалий ташрифи давомида эришилган эди.

Музокараларда Беларусь қишлоқ хўжалиги ва озиқ-овқат вазири ўринбосари Игорь Дорофейчик, Ўзбекистон Республикасининг Беларусь Республикасидаги Фавқулодда ва Мухтор Элчиси Рахматулла Назаров ҳамда ўзбек ишбилармон доиралари вакиллари иштирок этдилар.

Учрашувда Минск шаҳрида Ўзбекистон савдо уйини ташкил этиш масаласи атрофлича муҳокама қилинди. Ушбу савдо уйи орқали қишлоқ хўжалиги ҳамда электротехника маҳсулотларини тақдим этиш ва уларнинг савдосини йўлга қўйиш режалаштирилмоқда.

Шунингдек, HoReCa соҳасини ривожлантириш доирасида Беларусь ҳудудида ўзбек миллий таомлари ресторанини очиш ташаббуси ҳам кўриб чиқилди.

Томонлар Витебск вилоятида 15 минг гектар ер майдонида чорвачилик ва картошка етиштириш йўналишида қўшма лойиҳаларни амалга ошириш имкониятларини муҳокама қилдилар. Мазкур йўналишда қўшма ишлаш, инвестиция жалб қилиш ва маҳсулотларни қайта ишлаш ҳамда экспорт қилиш истиқболлари юзасидан фикр алмашилди.

Учрашув якунида ҳамкорликни амалий босқичга олиб чиқиш ва аниқ лойиҳаларни ишлаб чиқиш бўйича келишувга эришилди.