Ўзбекистон ва БАА CITES CoP20 саммитида атроф-муҳитни муҳофаза қилиш бўйича ҳамкорликни муҳокама қилишди

Тошкент, Ўзбекистон (UzDaily.uz) — Самарқандда бўлиб ўтаётган Ёввойи фауна ва флора турлари халқаро савдоси тўғрисидаги конвенциянинг 20-сессияси (CITES CoP20) доирасида Ўзбекистон Республикаси Президентининг экология масалалари бўйича маслаҳатчиси — Экология ва иқлим ўзгариши миллий қўмитаси раиси Азиз Абдуҳакимов Бирлашган Араб Амирликларининг иқлим ўзгариши ва атроф-муҳит вазири, Вазирлар Маҳкамаси аъзоси Амна бинт Абдулло Ал-Даҳак Ал-Шамси билан учрашди.

Музокаралар давомида томонлар табиатни муҳофаза қилиш, экотизимларни барқарор бошқариш ва ноёб турларни сақлаш борасида икки томонлама ҳамкорликни кенгайтириш масалаларини муҳокама қилди.

Вазир Амна Ал-Даҳак Ўзбекистонда Хитой Фанлар академиясининг Шинжон экология ва география институти билан ҳамкорликда ташкил этилган минтақавий марказ очилгани муносабати билан самимий табрик йўллади.

У бу ташаббусни Марказий Осиёда экологик мониторингни ривожлантиришга қўшилган муҳим илмий-амалий ҳисса сифатида юқори баҳолади.

БАА томонининг таъкидлашича, улар Хитой билан биргаликда “чўл иқтисодиёти” концепцияси асосида чўл ҳудудларини ўзлаштириш ва барқарор ривожлантириш бўйича ҳамкорликни кенгайтиришга тайёр. Шу билан бирга, Ўзбекистон иштирокида уч томонлама шериклик механизмларини йўлга қўйиш имкониятлари ҳам кўриб чиқилмоқда.

Учрашувда йиртқич қушларни асраш ва уларни ҳисобга олиш тизимини такомиллаштириш масалаларига алоҳида эътибор қаратилди. Амна Ал-Даҳак БАА томонидан илгари сурилаётган лочинларни рўйхатга олиш ва рақамли идентификация қилиш ташаббусларини қўллаб-қувватлашга чақирди.

Унга кўра, рақамли паспортлар тизимини жорий этиш ноёб турларни кўчириш устидан назоратни мустаҳкамлаб, CITES доирасида халқаро ҳамкорликни кенгайтиради.

Азиз Абдуҳакимов БАА билан ҳамкорликни янада кенгайтириш ва минтақада кучайиб бораётган экологик чақириқлар шароитида тажриба алмашиш муҳим эканлигини таъкидлади.

Томонлар амалий ҳамкорликни давом эттиришга, тегишли вазирлик ва илмий ташкилотлар даражасида янги қўшма ташаббусларни кўриб чиқишга келишиб олди.