Ўзбекистон ва 4iG рақамли технологияларни муҳокама қилди

Тошкент, Ўзбекистон (UzDaily.uz) — Ўзбекистон Бош вазирининг ўринбосари Жамшид Ходжаев Тошкент шаҳрида 4iG компанияси бошқарув кенгаши раиси ва бош директори Геллерт Ясай билан учрашув ўтказди.

Томонлар нафақат халқаро ҳамкорларни жалб этиш, балки қўшма лойиҳалар доирасида узоқ муддатли технологик ҳамкорликни йўлга қўйиш муҳимлигини таъкидладилар.

Музокаралар давомида телекоммуникациялар, рақамли инфратузилма ва илғор технологиялар соҳасида ҳамкорликни кенгайтириш истиқболлари кўриб чиқилди. Ахборот технологиялари, спутник ва геоаналитик ечимлар соҳасида қўшма ташаббусларни йўлга қўйиш имкониятларига, шунингдек IT Park Uzbekistan ва Uzcosmos билан ҳамкорликни ривожлантиришга алоҳида эътибор қаратилди.

Шунингдек, иқтисодиётнинг устувор тармоқларида янги лойиҳаларни илгари суриш воситаси сифатида Ўзбекистон-Венгрия инвестиция жамғармасининг салоҳияти муҳокама қилинди.

Қайд этилганидек, 4iG Ўзбекистонда рақамли трансформация ва технологик модернизация вазифаларини амалга оширишда истиқболли ҳамкор сифатида кўрилмоқда.

Томонлар ҳамкорликни янада ривожлантириш ва янги амалий ташаббусларни ишга туширишга ишонч билдирдилар.