Тошкент, Ўзбекистон (UzDaily.uz) — Туркиянинг Истанбул шаҳрида бўлиб ўтаётган «AYMOD-2025» халқаро кўргазмаси доирасида «Ўзчармсаноат» уюшмаси ва унга аъзо корхоналар жамоавий стенд билан иштирок этмоқда.

Кўргазма доирасида Истанбул чарм ва чарм маҳсулотлари экспортчилари уюшмаси билан музокаралар ўтказилди. Учрашув давомида Ўзбекистон корхоналари ва Туркиянинг етакчи чарм ишлаб чиқарувчи компаниялари ўртасида бизнес алоқаларни ўрнатиш масаласи муҳокама қилинди.

Коня Савдо-саноат палатаси вакили билан туркиялик инвесторлар капитали асосида Ўзбекистонда йирик инвестицион лойиҳаларни амалга ошириш бўйича музокаралар олиб борилди.

Хитойнинг йирик ҳомашё ишлаб чиқарувчи корхоналари ҳам Ўзбекистонга қизиқиш билдирмоқда. Хусусан, Фарғона вилоятида қўшма ишлаб чиқариш лойиҳасини ташкил этиш масаласи кўриб чиқилмоқда.