Ўзбекистон терма жамоаси тиббий ва мураббийлар штабини кучайтирди

Тошкент, Ўзбекистон (UzDaily.uz) — Ўзбекистон миллий терма жамоаси FIFA Series турнирига тайёргарлик ҳамда яқинлашиб келаётган ўқув-машғулот йиғинлари доирасида тиббий ва мураббийлар штабини кучайтирмоқда, бунинг учун тажрибали хорижий мутахассислар жалб этилмоқда. Бу ҳақда Ўзбекистон футбол ассоциацияси хабар берди.

Жумладан, жамоа билан ишлашга спорт тиббиёти ва ортопедия соҳасидаги мутахассис Энрико Кастеллаччи қўшилди. У кўп йиллар давомида Италия терма жамоаси шифокори лавозимида фаолият юритган. Шунингдек, у аввал Италия футбол шифокорлари ассоциациясига раҳбарлик қилган ва мамлакат Миллий ортопед-травматологлар ассоциациясида вице-президент лавозимида ишлаган.

Бундан ташқари, тиббий штаб таркибига Италиялик физиотерапевт Симоне Сиджильо ҳам киритилди. У «Палермо», «Салернитана» ва «Беневенто» клубларида ишлаш тажрибасига эга.

Шунингдек, терма жамоа мураббийлар штабига «Наполи»нинг собиқ футболчиси Паоло Каннаваро ҳам қўшилади. 44 ёшли мутахассис жамоа бош мураббийи Фабио Каннаварога ёрдамчи сифатида фаолият олиб боради. Фабио Каннаваро ўтган йил октябридан буён терма жамоани бошқариб келмоқда. Илгари ака-ука Каннаваролар Хитойнинг «Гуанчжоу» клубида, шунингдек Италиянинг «Беневенто» ва «Удинезе» жамоаларида биргаликда ишлаган.

Айни пайтда Ўзбекистон футбол ассоциацияси Паоло Каннаваронинг тайинланишини расман эълон қилмаган. Бироқ унинг Instagram’даги профилида у миллий терма жамоа бош мураббийининг ёрдамчиси экани кўрсатилган.